Uyaveva uMbalula kuvela imikhankaso yamakhempu kwi-ANC
Patrice Motsepe
Image: Karen Sandison / Independent Newspapers
UWOTHA ubomvu uNobhala jikelele we-ANC, uMnuz Fikile Mbalula, ngokuvela kwemikhankaso omunye oseka yena, noweseka usomabhizinisi, uMnuz Patrice Motsepe, embangweni wokuhola i-ANC.
UMbalula uthe bazothathelwa izinyathelo labo asebeqale ukukhuluma ngombango wezikhundla. Ukusho lokhu ngesikhathi ekhuluma nabezindaba abebehambele umhlangano we-ANC, iLekgotla.
I-ANC izokuba nengqungquthela yokukhetha ubuholi ngonyaka ozayo.
Yize i-ANC ingakaluvuli uhlelo lokuphakanyiswa kwabazongenela umbango wezikhundla, isiqalile imikhankaso yabagaqele izikhundla.
Ngeledlule, kuvele ukuthi kukhona abakhiqiza izikibha ezizosetshenziswa emikhankasweni kaMotsepe.
Kuthe kusabatshazwa lokho, kwavela ingoma eyeseka umkhankaso kaMbalula wokuhola i-ANC. UMbalula uthe bazothathelwa izinyathelo abenze le mikhankaso uma beke batholakala.