Amawele akwaQwabe avula unyaka ngecwecwe elisha
U-VIGGY noVirginia Qwabe bazokwethula i-albhamu yabo entsha ngoMgqibelo
Image: FACEBOOK
IZINTOKAZI ezazakhela ugazi kuma-Idols SA ngo-2019, uViggy noVirginia Qwabe, zibuye ngenkani emculweni we-Afro pop.
La matshitshi asahamba uMkhosi woMhlanga futhi asezibiza ngamaQ Twins azokhipha i-albhamu yawo yesibili esihloko sithi Imicabango ngoJanuwari 30.
Ngokubambisana la mawele aKwaDukuza, ameme abathandi bobumnandi ukuba baphelele ngobuningi babo emcimbini oyisendlalelo wokwethulwa kwaleli cwecwe (listening session) eThe Villa eWaterfront, ku-98 Mahatma Gandhi Road eThekwini, namhlanje ngo-7 ebusuku.
Banxuse izithameli ukuba ziswenke ngezingubo ezimhlophe. Kuleli cwecwe kuboshelwe abaculi abahlukahlukene okubalwa kubo uNomfundo Moh engomeni ethi Ezinkingeni, uMawhoo engomeni ethi Ukuthula, uMjolisi noZamambo abapikwe engomeni ethi Baphi, uShandesh noBlaq Major bapikwe engomeni ethi Bekumnandi, uNaledi Aphiwe engomeni ethi Uthando, uBeast RSA, Dladla Mshunqisi noDJ Fuzeh baboshelwe engomeni ethi Impilo. Lezi zintokazi ziphinde zapika u-Exclusive Drumz noTee Jay eculweni elithi Imali.