Izindaba

I-ANC isobishini 'ngokugweva' nemali yamaciko

Charles Khuzwayo|Published

OKHULUMELA i-ANC kuzwelonke uMahlengi Bhengu-Motsiri uyakuqinisekisa ukuthi sebefakwe enkantolo yiSamro

Image: Picture: Itumeleng English/Independent Newspapers

I-AFRICAN National Congress (ANC) isobishini njengoba seyize yafakwa eNkantolo eNkulu yaseGoli ngenxa yezinsolo zokugweva nemali yamaciko ewu-R423 228, 75.

Isolezwe lithole ukuthi le nhlangano ezinze eLuthuli House eGoli igqigqiswa kule nkantolo yinhlangano eqoqa imali ngomculo osuke udlalwe emisakazweni naseziteshini zethelevishini iSouth African Music Rights Organisation (Samro) ngenxa yomculo owadlalwa kwiSiyanqoba Rally eyayiseFNB Stadium ngo-2024.

Ukunqwaha kwale nhlangano nalesi samba esicishe sibe yingxenye yesigidi kuphoqe abaholi beSamro ukuba bafake amaphepha enkantolo ngenhloso yokuphoqa i-ANC ukuba ikhokhe  isikweletu.

Ebuzwa yiSolezwe ngalezi zindaba, okhulumela i-ANC kuzwelonke, uMahlengi Bhengu Motsiri, ukuqinisekisile ukuthi asefikile amaphepha asenkantolo ekomkhulu lale nhlangano. Uvele washaya ngezimfishane wathi basasifunda isinqumo senkantolo.

"Sizobe sesichaza kabanzi ngesinyathelo esizothathwa emuva kwalokho."

Isolezwe libuye lathola ukuthi kufakwana enkantolo nje kungenxa yesivumelwano esenziwa yisikhulu seSamro uKarabo Senna nemenenja jikelele ye-ANC uPatrick Flusk ngoJuni 24, 2024.

Lesi sivumelwano esibhalwe phansi sasigunyaza i-ANC ukuba idlale ngokukhululeka umculo oqanjwe amaciko angamalungu eSamro kunoma yikuphi lapho kuhlangene khona amalungu kaKhongolose.

Nebala kwiSiyanqoba Rally zaqhululwa izingoma zamaciko anganyelwe yiSamro. Emuva kwalokho abakwaSamro babe sebethumela i-invoice emahhovisi ale nhlangano ngenhloso yokuba bakhokhelwe imali.

Esikhundleni senkokhelo kuthiwa ubuholi bale nhlangano sebubhala buyacisha, bubamba buyayeka, budla amazambane ashisayo. Phezu koxhaxha lwezincwadi esezibhalelwe i-ANC kodwa kunhlanga zimuka nomoya.

Oyisikhulu ophikweni lwezokuxhumana kwaSamro, uNthabiseng Motsei, ucashunwe ekuqinisekisa ukuthi umacashelana abawudlaliswa yi-ANC sewubame emphinjeni. Uthe le mali abayifuneli bona kodwa bafuna ukuyidlulisela emacikweni okwadlalwa izingoma zawo eralini ye-ANC.

Isolezwe like labika ukuthi iSamro ayisakugunyazi ukuba kudlalwe umculo wamalungu ayo emicimbini ehlanganisa abantu kungekho sivumelwano nabagqugquzeli. Sekudingeka umgqugquzeli womcimbi abathumelele uhlu lwezingoma ezidlaliwe njengoba kwenziwa emsakazweni.