I-IFP nombhidlango wokukhuculula amaziko

I-IFP izoqala umkhankaso wokukhuculula amaziko ngaphambi kokuba iqale uhlelo lokuqoka abazoyimela okhethweni lohulumeni basekhaya.

Umholi we-IFP, uMnuz Velenkosini Hlabisa, uthe bafuna ukwenza isiqiniseko sokuthi bonke abazomela iqembu okhethweni oluzayo bazoqokwa amaziko asemthethweni.

Ukusho lokhu ngesikhathi ekhuluma emcimbini wokusonga umgubho weminyaka engu-50 kwasungulwa i-IFP obuseNgwavuma, ngoMgqibelo.

Imicimbi yokugubha iminyaka engu-50 kwasungulwa i-IFP yaqala ngoMashi.

I-IFP yasungulwa yinkosi Mangosuthu Buthelezi, ngo-1975, KwaNzimela, eMelmoth.

UHlabisa uthe isigungu esiphezulu se-IFP sithathe isinqumo sokuba sihambele onke amaziko eqembu ngaphambi kokuba kuqale uhlelo lokuqokwa kwabazongenela ukhetho lohulumeni basekhaya.

"Onke amaziko, ngenxa yokuthi kunomsindo nokuxokozela kuwona, sizowadlulisa edibheni, ayobalwa onke. Sifuna ukuthi uma sekuyophakanyiswa abazomela iqembu, amakhansela azomela i-IFP sifuna ukuthi sihambe namaziko esaziyo ukuthi angamaziko esiwadlulise edibheni, adipha, sawathola ukuthi alungile. Sifuna ukuhamba namaziko esaziyo ukuthi azokwazi ukuhola umkhankaso ozosisiza ukuthi sinqobe ukhetho."

UHlabisa ugqugquzele amalungu eqembu ukuba aqinise ekwakheni amaziko azolekelela iqembu okhethweni oluzayo.

"Hambani niyokwakha amaziko azokwenza i-IFP iphile, hambani niyokwakha iziyingi ezizokwenza ukuthi i-IFP inqobe ukhetho lomasipala ngonyaka ozayo."

UHlabisa ukhuze izimpi zangaphakathi eqenjini.

"Iqembu lezombusazwe elivumela ukwehlukana, kuba isihlava okuthi noma selizama noma yini ukusikhipha, kube nhlanga zimuka nomoya. Asakheni udonga oluzokwenza ukuthi singangeni lesi sihlava esisibona komakhelwane. Asivuse izidonga, sibiyele iqembu lingangenwa ilesi sihlava."

UHlabisa uthe bafuna ukwenza kahle okhethweni lohulumeni basekhaya.

I-IFP iphethe komasipala abawu-27 KwaZulu-Natal. UHlabisa uthe omasipala abaphethwe yi-IFP bahamba phambili ekuphathweni kwemali.

"Siyajabula ukuthi omasipala abaningi abaphethwe yi-IFP bathola imibiko engenagcobho. Kuwumlando esiwukhandayo ukuthi lapha KwaZulu-Natal omasipala abaningi abathola imibiko engenagcobho baphethwe i-IFP."

UHlabisa uthe imiphumela yakamumva yokhetho ikhombisa ukuthi i-IFP iyaqhubeka nokukhula yize engasekho uButhelezi.

I-IFP iye okhethweni okokuqala engasekho uButhelezi ngonyaka owedlule. Emva kwalo, i-IFP yajoyina uhulumeni wokubambisana ophethe kuzwelonke, njengoba kuyiyona ehola uhulumeni waKwaZulu-Natal.