Ziyashukana eqenjini elingababeki beNkosi KwaZulu-Natal
Amalungu eNFP eseka usihlalo wenhlangano uMbali Shinga
Image: Sithunyelwe
Ziyashukana eqenjini elingababeki beNkosi kuhulumeni waKwaZulu-Natal, iNFP.
Amalungu eNFP azwelana noMphathiswa wezokuThuthukiswa koMphakathi KwaZulu-Natal, uNksz Mbali Shinga, ayabhikisha ngaphandle kwendawo okubanjelwe kuyo isigcawu sokumqondisa ubugwegwe.
Isigcawu sokuqondisa uNksz Shinga ubugwegwe sibanjelwe eThekwini.
Amalungu eqembu anganelisekile afuna kumiswe isigcawu, athi uNksz Shinga uboshelwa amanqina enyathi.
UNksz Shinga wabizelwa phambi kwesigcawu sokuqondisa ubugwegwe emva kokuba eshaye indiva umyalelo weqembu wokuba aseke isiphakamiso sokungabethembi ubuholi bukandunankulu waKwaZulu-Natal, uMnuz Thami Ntuli.
Khonamanjalo olunye uhlangothi olungahambisani nesinqumo sokushushiswa kukaNksz Shinga, kanye nabanye abaholi beqembu abangamakhansela, luzokuba nesithangami nabezindaba, namhlanje.
Isithangami sizoholwa usihlalo weqembu kuzwelonke, uMnuz Sibusiso Mkhabela, oyimeya yoMasipala waseDumbe.