Kusolwa umdonsiswano wokulawula imali kwiMKP

KUSOLWA umdonsiswano wokulawula izigidi zamarandi ngokuxoshwa kukamgcinimafa weMKP, uMnuz Mpiyakhe Limba.

Kunamahlebezi okuthi uLimba ubesembangweni nabathile eqenjini wokulawula ukuphathwa kwezigidi zamarandi ezitholwa yiqembu.

Kuthiwa labo abebebangisa uLimba bebemsola ngokuhluleka ukuphatha ngendlela imali yeqembu kanti naye uLimba kuthiwa ubenezinsolo zokuthi kukhona abaholi abehlisa ngemilenze imali yeqembu.

Kuthiwa uLimba uxoshwe eseqoke ngisho inkampani ebizophenya ngokunyamalala kwemali yeqembu.

ULimba ukhonjwe indlela ezinguqukweni ezimenyezelwe yiqembu ngoMsombuluko. Isikhundla sikaMgcinimafa sinikezwe owayeyisikhulu seTranset, uMnuz Brian Molefe.

I-MKP ayizange isidalule isizathu sokuxosha uLimba kepha Isolezwe libone incwadi ebhalwe ngumholi weqembu, uMnuz Jacob Zuma, eveza izizathu zokuxoshwa kukaLimba.

Kule ncwadi uZuma ukhale ngokusetshenziswa budedengu kwemali yeqembu athe kwenza ukuthi iqembu lisheshe liphelelwe yimali. Uphinde aveze ukuthi uLimba ubeseqoke inkampani ebizophenya izinsolo zokubhubhudlwa kwemali yeqembu nokuyinto uZuma athe iphambene nemithetho yeqembu.

UZuma uthe ukuphathwa kwemali yeqembu indaba yangaphakathi okungafanele inekezwe inkampani yangaphandle.

I-MKP iphinde yenza izinguquko ePhalamende, yadiliza esikhundleni usotswebhu, uNkk Colleen Makhubele. Kuqokwe uNkk Mmabatho Mokoena-Zondi ukuba abambe lesi sikhundla.

UNkk Makhubele akaqali ukuxoshwa kulesi sikhundla njengoba eke waxoshwa ngonyaka owedlule kodwa wabuye wabuyiselwa esikhundleni ngokushesha.

Ukuxoshwa kukaNkk Makhubele ngonyaka owedlule kwaholela ekumisweni komholi weqembu ePhalamende, uDkt John Hlophe, obhekene nophenyo lwangaphakathi.

UHlophe wazidalela amazinyo abushelelezi ngokuthatha isinqumo sokudiliza uNkk Makhubele engamtshelanga uZuma.

Abahlaziyi bezepolitiki bathe izinguquko ezenziwa kulandelana zenza ibukeke njengeqembu elingakakulungeli ukuphatha.

USolwazi Musa Xulu uthe ukungahleleki kweMKP kukhombisa ngokusobala ukuthi leli qembu alikulungele ukuphatha.

USolwazi Sipho Seepe uthe okubi ukuthi iMKP ikhombisa ukungahleleki ngesikhathi esibi lapho kubhekwe okhethweni.

Umhlaziyi wezepolitiki ozimele, uMnuz Thabani Khumalo, uthe kubukeka sengathi iMKP isikhohliwe ukuthi kungani abantu bavotela yona okhethweni olwedlule.

"Abantu abavotelanga iMKP ngoba nakhu bethanda imigomo yabo kodwa bayivotela ngoba nakhu sebekhathele amaqembu akhona."

Okhulumela iMKP, uMnuz Nhlamulo Ndhlela, uthe basazoqhubeka nokwenza izinguquko.

UNdhlela uthe kwiMKP akekho umuntu onesikhundla esingunaphakade.