Kuhlongozwa ukunyusela ongqongqoshe imiholo

BANGASE behleke bodwa ongqongqoshe bakuleli ngonyaka ozayo uma siphumelela isiphakamiso sokuba banyuselwe imiholo.

Inhlangano enquma imiholo yabaholi abanezikhundla kuhulumeni, i-Independent Commission for the Remuneration Public Office Bearers, iphakamise ukuthi abaphethe izikhundla kuhulumeni banyuselwe imiholo ngo-4.1% kunyakamali ozayo.

Lesi siphakamiso siqukethwe kwi-gazette eshicilelwe ngeledlule. Igazette iphakamisa ukuthi umholo kaMengameli Cyril Ramaphosa, unyuke ngo-R137 000, nokusho ukuthi uzohola u-R3.4 million ngonyaka.

IPhini likaMengameli, uMnuz Paul Mashatile, kuphakanyiswa linyuselwe ngo-R130 000, nokusho ukuthi lizohola u-R3.1 million ngonyaka.

Ongqongqoshe bona kuphakanyiswa ukuba bakhushulelwe ngo-R110 000, nokusho ukuthi bazohola u-R2.8 million ngonyaka.

IKhabhinethi kaRamaphosa inongqongqoshe abangu-32. Amaphini ongqongqoshe wona azohola imali engaphezu kuka-R2.3 million ngonyaka.

Kunamaphini ongqongqoshe angaphezu kuka-40 kuleli. Kwabanye abazonyuselwa imiholo kubalwa nondunankulu kanye namajaji.

ICosatu ithe ayihambisani nokunyuselwa kwabaholi bezepolitiki imiholo.

Okhulumela iCosatu ePhalamende, uMnuz Matthew Parks, uthe izwe licwile ezikweletini.

"Sebekhohliwe yini ukuthi ekuqaleni konyaka bona osopolitiki bebefuna ukuthi kunyuswe intela ngo-2% ngoba nakhu bethi izwe alinayo imali? UNgqongqoshe wezeziMali (uMnuz Enoch Godongwana) usanda kwenza isexwayiso sokuthi kungase kwenzeke iphinde inyuswe intela. Kungani kufanele kunyuselwe osopolitiki imiholo ekubeni abanye abantu bethwele kanzima?"

UParks ubuze ukuthi yini lena engaka eyenziwa osopolitiki ukuba sebengaze benyuselwe imiholo ngemali engaka.

"Uma sikhuluma ngosopolitiki lana sikhuluma ngongqongqoshe abathola izinto eziningi mahhala. Banikwa izindlu zamahhala, bayakhokhelwa izindleko zokuhamba. Uma sikhuluma ngosopolitiki sikhuluma ngezimeya eziphethe omasipala abahluleka ukuhambisa izidingo kubantu. Siyazi ukuthi bakhona osopolitiki abenza umsebenzi oncomekayo kodwa iningi labo bayahluleka ukwenza umsebenzi wabo. Asikho isidingo sokuthi kunyuselwe osopolitiki imali. Le mali ngabe isetshenziselwa ukuqasha odokotela. Okubuhlungu ukuthi uma abasebenzi bakahulumeni befuna ukunyuselwa imiholo kuthiwa imali ayikho."

UParks uthe abaphikisani nokuthi amajaji nezimantshi banyuselwe imiholo.

"Amajaji nezimantshi abaholi imali eyanele ingakho abanye babo bewushiya umsebenzi."

UParks unxuse uRamaphosa ukuba angavumi ukuba kunyuselwe osopolitiki imiholo.