I-ANC ithi 'andizi' esiphakamisweni se-MK sokuketula uNtuli

KUSINDA kwehlela kwi-MK efuna ukuketula uNdunankulu waKwaZulu-Natal, uMnuz Thami Ntuli, njengoba i-ANC isiphumele obala yathi ngeke iseseke isiphakamiso sokungabethembi ubuholi bukaNtuli.

Umgqugquzeli wethimba lesikhashana elihola i-ANC KwaZulu-Natal, uMnuz Mike Mabuyakhulu, uthe basazohlala kuhulumeni wesifundazwe oholwa yi-IFP.

Ukusho lokhu ngesikhathi ekhuluma nabeSABC kunomhlangano wokulungiselela ingqungquthela ye-ANC kazwelonke, iNational General Council (NGC), ezokuba kule nyanga.

Umhlangano we-ANC KwaZulu-Natal ubungoMgqibelo, eThekwini.

I-MK ifake isiphakamiso sokungabethembi ubuholi bukaNtuli esizolalelwa ngoDisemba 15. I-MK inezihlalo ezingu-37 kwezingu-80 esiShayamthetho.

Ukuze siphase isiphakamiso sayo idinga ukwesekwa elilodwa lamaqembu akuhulumeni wokubambisana kanti iqembu elingekho kuhulumeni wokubambisana, i-EFF, selishilo ukuthi ngeke liseseke isiphakamiso sokukhipha uNtuli.

Amanye amaqembu ayingxenye kahulumeni wokubambisana yiDA neNFP. I-DA ayiseseki isiphakamiso sokukhipha uNtuli kanti iNFP ihlukene phakathi.

I-ANC ike yakhombisa ukuba manqika ukuqhubeka nokuhlala kuhulumeni wokubambisana ngesikhathi i-IFP iketula imeya yesifunda uMkhanyakude, uMnuz Siphile Mdaka.

Kepha manje kubukeka i-ANC ne-IFP sebekulungisile "ukukhuluma kwegceke" njengoba uMdaka esebuyiselwe esikhundleni.

UMabuyakhulu uthe abazimisele ukushiya kuhulumeni wesifundazwe.

"Kunezizathu ezasenza sangena kuhulumeni wesifundazwe, futhi kunezivumelwano esazisayina ngesikhathi singena. Izizathu ezasenza sangena kuhulumeni wesifundazwe azikashintshi nanamhlanje. Yingakho sisazoqhubeka sibe yingxenye kahulumeni wesifundazwe. Sizoqhubeka nokuhlonipha izivumelwano esazenza ngesikhathi singena kuhulumeni wesifundazwe."

Kulindeleke ukuthi kume yonke into emigwaqweni eseduze nesiShayamthetho uma sekulalelwa isiphakamiso seMK.

Ngeledlule amalungu eMK nawe-IFP ayeqhudelana ngemibhikisho ngaphandle kwesiShayamthetho.

Amalungu eMK ayenombhikisho lapho ayefaka khona ingcindezi yokuba kuxoshwe uNtuli.

Amalungu e-IFP nawo ayenowawo umbhikisho ngaphesheya komgwaqo lapho ayefunga egomela ethi uNtuli ngeke aphume esikhundleni.

Kwasiza amaphoyisa alamula amalungu alamaqembu ayesefuna ukubambana ngezandla.