Lizulelwa amanqe ikusasa likaHlophe kwipolitiki
UMHOLI weMK, uMnuz Jacob Zuma, uhlangane namalungu eqembu ePhalamende
Image: Facebook/ MK Party
KUYENYUKELA koyiphini lomholi weMK elimisiwe, uDkt John Hlophe, osekuqokwe ithimba labameli ukuba limphenye kwaphinde kwaqokwa nomuntu ozobamba isikhundla sakhe ePhalamende.
I-MK imemezele ukuqokwa kwethimba labameli elizophenya uHlophe, yaphinde yamemezela ukuqokwa komuntu ozobamba isikhundla sokuba umholi weqembu ePhalamende.
Lezi zinqumo zimenyezelwe emva komhlangano womholi weMK, uMnuz Jacob Zuma namalungu eqembu ePhalamende.
UHlophe wamiswa kwesokuba yiphini lomholi weMK nakwesokuba umholi weqembu ePhalamende emasontweni amabili edlule.
Des van Rooyen
Image: PHANDO JIKELO Parliament of SA
UHlophe wamiselwa ukudiliza uSotswebhu oMkhulu weqembu ePhalamende, uNkk Colleen Makhubele.
Kuthiwa uHlophe akazange abonisane nabaholi be-MK ngaphambi kokuthi axoshe uNkk Makhubele.
Ngesikhathi kwenzeka konke lokhu, uZuma ubengekho kuleli njengoba ayesohambweni lwaseBurkina Faso.
Uthe uma ebuya uZuma, kwabe sekumiswa uHlophe kwabuyiselwa uNkk Makhubele esikhundleni.
UNKK Colleen Makhubele
Image: X
Okhulumela iMK, uMnuz Nhlamulo Ndhlela, uthe uZuma ukugcizelelile ukuthi abaholi abajutshwe ePhalamende abakwazi ukuzithathela izinqumo.
"Ngesikhathi ebuya eBurkina Faso, uZuma watshelwa ngezinguquko ezenziwe ePhalamende. Lezi zinguquko zenziwa ngaphandle kokuba kwaziswe yena noma abanye abaholi beqembu. Lokhu kuphambene nemigomo yeqembu. "
UNdhlela uthe uZuma ukugcizelelile ukuthi uHlophe umisiwe eqenjini.
"UHlophe uzomiswa kuze kuba kuphothulwa uphenyo olusemthethweni. Kuqokwe ithimba labameli elizokwenza uphenyo ngokushesha."
UNdhlela uthe uHlophe useyilo ilungu leMK nelePhalamende.
Selokhu kumenyezelwe ukumiswa kwakhe uHlophe akakaze abonakale ePhalamende.
UNdhlela uthe uMnuz Des Van Rooyen, uyena ozobamba isikhundla sokuba umholi weqembu ePhalamende.
UVan Rooyen wayeqokwe uHlophe ukuba abe ngusotswebhu ngesikhathi ediliza uNkk Makhubele.
Ukubuyiselwa kukaNkk Makhubele esikhundleni, kusho ukudilizwa kukaVan Rooyen obekusaphele usuku eqokiwe.
"Ukuqokwa kukaVan Rooyen ukuba abambe isikhundla kuzokwenza isiqiniseko sokuthi uyaqhubeka umsebenzi weqembu ePhalamende. UNkk Makhubele naye uzoqhubeka esikhundleni sikasotswebhu. Lokhu kuzokwenza ukuthi ungaphazamiseki umsebenzi weqembu."
UNdhlela uthe baqoke ithimba labaholi elizobamba izingxoxo namalungu ePhalamende ukwenza isiqiniseko sokuthi awuphazamiseki umsebenzi weqembu.
Kuleli thimba kukhona iphini lesibili lomholi weMK, uMnuz Tony Yengeni, uSihlalo weMK uMnuz Nathi Nhleko noMnuz Magasela Mzobe, oyinhloko yehhovisi lomholi weMK.
"Sithanda ukuqinisekisa abantu ukuthi iqembu liyaqhubeka nomsebenzi walo."
DKT John Hlophe
Image: SIBONELO NGCOBO Independent Media