Izindaba

Umlingisi usabadlisela ogageni emqhudelwaneni wamagidangoma

Charles Khuzwayo|Published

UQAGELA Nxumalo ongomunye wamagidangoma adlana imilala kwiSomnandi Maskandi Dancers Competition

Image: FACEBOOK

UMLINGISI oqavile efilimini esihloko sithi Tales of a Zulu Folk Dancer (Igidangoma), uQagela Nxumalo, uqengqeleza phambili emqhudelwaneni wamagidangoma abanga umklomelo wezinkomo ezinhlanu nezimbuzi ezinhlanu kwiSomnandi Maskandi Dancers Competition. 

Kulo mncintiswano uQagela (I) waseShowe, ogidela uyise ongumculi kamaskandi uGadla "Makhombane" Nxumalo, ulandelwa yigidangoma likaSaliwa, uNqulwane (P), Mashayisa (F) ogidela uSomnandi, Inkomo Kazwelonke (O) ogidela uMtshengiseni,  Shisamabhodwe Yellow Omega (B)  ogidela uMzukulu, Njoko (R) ogidela uJaiva Zimnike, Godide (L) ogidela uNjabulo Langa, Mashuna (G) ogidela uKhuthuza, Phumelela (N) ogidela u-Ali Mgube, Mavuthela (H) ogidela iNkosi YamaGcokama, Semfene Nala (C) ogidela uLimit, Thibela (D) ogidela uKhuzani,  Yakhani (A) ogidela uMenzi, Nathi (S) ogidela uGatsheni, Dladla (K) ogidela uSwidi, Mkhuseli (M) ogidela uNtencane, Somatekisi (Q) ogidela uMdumazi, Ncenga Gcwensa (E) ogidela Ithole LeNdidane, Maplaza (T) ogidela uMafikizolo bese kuba uMqadi (J) ogidela uBahubhe. Yize kuqale kwaqokwa uZakhe2% ogidela uMthandeni SK kodwa wabuye wahoxa, indawo yakhe ibe seyithathwa yindodana kaMtshengiseni "Indidane" Gcwensa, uNcengwa.

Esitatimendeni kuthiwe u-2% akanankinga nalo mncintiswano futhi uyamhlonipha umgqugquzeli wawo, uThokozani "Somnandi" Langa kodwa uhoxiswe yisimo esithize.

Amagidangoma  avotelwa ngokuthi uthumele iSMS enohlamvu oluseceleni kwegama legidangoma  ku-44447, isibonelo ubhala U bese uthumela ku-44447.

Umgqugquzeli walo mqhudelwano,  uSomnandi, uthe igidangoma elizodla umhlanganiso lizomenyezelwa kwi-4th Somnandi Music Festival, ePrince Mangosuthu Airport oLundi ngoDisemba 20.

Kulo mcimbi kuboshelwe uThokozani Langa, Soul Brothers, AmaQ Twins, Ntencane, Menzi, Gatsheni, uMafikizolo, Mshiniwemali, Linda Gcwensa, Limit, Saliwa, Mzukulu, Njabulo Langa, Luve Dubazane, Skhumba STS, Stability, Bhasini, Quality, Mlabalaba, Mashelela noJikelele.

Laba baculi bayosina bededelana kusukela ngo-1 emini kuze kulamule u-6 ekuseni ngakusasa. Amathikithi aseyatholakela eShoprite Checkers, Spar, TicketPro naseComputicket ngo-R100, R150 nango-R500.