Zindala zombili kuDJ Zinhle noCndo

AKWAZIWA mbhantshi kujiya ngokuzokwenzeka kumaSouth African Dance Music Awards (Sadma) njengoba kuqhathwe izintokazi zaKwaZulu-Natal ezingamavulandlela uma kukhulunywa ngokuklwejwa kwamapuleti ezindaweni zobumnandi.

Emunxeni weBest Female DJ kutholene phezulu uSindisiwe "DJ Cndo" Zungu (40) waseMandeni noNtombezinhle "DJ Zinhle" Jiyane-Mahosana (42) waseDannhauser. UDJ Cndo waba nguDJ wokuqala wesifazane ukukhipha i-albhamu ethi The First Lady of House ngo-2007, nokwamenza wateketiswa ngeleFirst Lady of Afrotainment.

Wabe eselandela uDJ Zinhle nge-albhamu ethi Feminine Touch ngo-2009, eteketiswa ngeleThe Church Lady.  Lezi zintokazi zitholene phezulu nomsakazi weMetro FM uLerato "LKG" Kganyago, umsakazi weGagasi FK uHappiness "Happy Gal" Ndlovu waseMpangeni noNompumelelo "Rosetta Deep" Hlatshwayo waseThekwini. UDJ Happy Gal ubuye waqhathwa noDJ Zeal woKhozi, uSphectacular & DJ Naves, DJ Heazy beGagasi FM noRyan The DJ & Roxpaper2Scissors beMetro FM kwiBest Radio DJ.

Emunxeni weBest Male DJ kubambene u-Oscar Mbo, Dlala Thukzin, Skillz, Funky Qla noJosiah De Desciple. Kuboshelwe kakhulu nasemunxeni weBest Female Vocalist njengoba kukhona uBoohle, Skye Wanda, Tracy, Thatohatsi, Nkosazana Daughter noBassie kanti kwiBest Male Vocalist kuno-Eemo, Thukuthela, Sykes noZeh Mcgeba.

Kushubile nakwiBest Live Act njengoba kunoSykes, Nkosazana Daughter, Tracy, Thatohatsi, Boohle, Thukuthela, Dlala Thukzin noGoldmax.

KwiBest Dance Music Album kudlana imilala oDJ Fisherman - Chapter X, Dlala Thukzin - Finally Famous Too noJosiah De Disciple - Safori kanti kwiBest Producer kunoSkillz, Drega, Dlala Thukzin, DJ Fisherman, Dankie Boi, Goldmax, Campsters, We Dem Boyz, BlaQRhythm, BlacksJnr neMK Productions.

Ezingomeni ezibanga kwiDance Song of The Year kukhona ethi Sohlala Sonke kaDlala Thukzin, AmaGear kaDlala Thukzin, Fomo kaDlala Thukzin, Funky Qla noGoldMax, Not For Kids kaCairo CPT, Vathela yeCampmasters, Kosinda Obalekayo yeCampmasters neKwalanga.2.0 kaBassie noM Touch.

Izinhlelo zemisakazo eziqhathwe kwiBest Dance Music Radio Show ngolweMetro i-Urban Beat, olweGagasi iPre-Party  noloKhozi FM iFakumoya.

Abadle umhlanganiso bazomenyezelwa ePlayhouse eThekwini ngoNovemba 22. Ukuvotela intandokazi yakho, ungangena ku- vote.sadancemusicawards.com.