Kugqame ukungahleleki kugcagcelwa iSilo
ISilo uMisuzulu Sinqobile kaZwelithini sikhehle undlunkulu uNomzamo Myeni ngaphambi kodwendwe obelusesigodlweni kwaKhangelamankengane, izolo
Image: Facebook
KUGQAME eyokungahleleki nokungaxhumani kahle ezinsikeni ezeseke ubukhosi bukaZulu ngesikhathi kugcagcelwa iSilo uMisuzulu Sinqobile kaZwelithini.
Udwendwe lweMbube noNdlunkulu uNomzamo Myeni lukhuphuke kunongabazane ngenxa yokuthi aluzange lumenyezelwe yizinhlaka eziseke isihlalo sobukhosi.
Okhulumela iSilo uMntwana uThulani kaGqikazi Zulu, nePhini likaNdunankulu kaZulu, Inkosi Phathisizwe Chiliza, abazange balumemezele lolu dwendwe obelusesigodlweni KwaKhangelamankengane izolo.
UNdlunkulu Nomzamo Myeni
Image: Facebook/ EFF
Udwendwe lwamenyezelwa umkhongi, uMntwana uGibizizwe Zulu.
AbaNtwana abaningi okubalwa kubo nabazalwa kanye neNgonyama esigodlweni KwaKhangelamankengane, kanye noNdlunkulu beSilo uGoodwill Zwelithini kaBhekuzulu, bebengabonwa nangokhalo emgcagcweni.
Kwaba isimo esifanayo nangoLwesihlanu ngesikhathi iMbube ikhehla uNdlunkulu.
UMntwana uGibizizwe uthe uma kukhona abanezikhalo ngamalungiselelo odwendwe bangaxhumana naye, abachazele.
ABASENDLUNKULU bebesenke beconsa kugcagca iSilo uMisuzulu kaZwelithini noNdlunkulu uNomzamo Myeni
Image: NQUBEKO NDLELA/ FACEBOOK
"Umgcagco ubuhlelwa abasemsamo. Kuhlukene kabili. Kukhona abasemsamo okufanele ukuthi izindaba zabo bazihlele, basicacisele ukuthi kuzolunga. Njengoba ngangishilo ukuthi uma kukhona abanezikhalo bangangithinta emva kwamasonto amabili, ngibachazele."
UMntwana uGibizizwe uwuchaze njengengqophamlando umgcagco weSilo.
Okhulumela uNdlunkulu, uMnuz Vuyo Sibiya, uvumile ukuthi bekunezinselelo ngesikhathi kuhlelwa umgcagco.
USibiya uthe ngesikhathi kuqhubeka amalungiselelo kube khona abasabalalisa imibhalo engamampunge ethi umgcagco uhlehlile.
Uthe okubajabulisayo ukuthi umgcagco ugcine ube yimpumelelo.
UMGCAGCO weSilo uMisuzulu kaZwelithini ubuzinyaziswe abaholi abehlukene okubalwa uMfundisi Thulasizwe Buthelezi noMnuz Julius Malema abaphahle iSilo
Image: NQUBEKO NDLELA/ FACEBOOK
Oke waba umdidiyeli wamabutho, uMntwana uVanana Zulu, uthe kukhona abaseNdlunkulu abazame ukuphazamisa umgcagco.
Ukusho lokhu ngesikhathi ekhuluma emkhehlweni.
IMbube yemukele abasekhweni layo ngenkomo.
Ikhuluma esibayeni, ithe kuyijabulisile ukufika kwabasekhweni layo.
UZulu walugcina ngo-2014 udwendwe lweMbube, ngesikhathi uMdlokombane egcagcelwa uNdlunkulu uZola Mafu Zulu.
Umgcagco wawusenkundleni yezemidlalo oLundi, kwakuphume nesinedolo.
Ungoti wezamasiko, uSolwazi Sihawu Ngubane, uthe bekufanele ube mkhulu umgcagco weNdlulamithi yamakhosi njengoba bekungokokuqala ukuba isinelwe selokhu yangena esihlalweni.
UNgubane uthe kwakufanele lumenyezelwe kusenesikhathi udwendwe.
"Mhlawumbe kwenziwa ikhona ukuthi akekho uNdunankulu kaZulu, ingakho kungenziwanga isimemezelo esifanele. Kungenzeka ukuthi abantu baba nesasasa ngoJanuwari, base beyadikibala ngesikhathi seluhlehla."
BEKUKHONA nabaseSwatini kugcagca iSilo uMIsizulu kaZwelithini noNdlunkulu uNomzamo Myeni
Image: NQUBEKO NDLELA / FACEBOOK
Umgcagco ubuhanjelwe abaholi bezepolitiki abaqavile okubalwa kuzo umholi we-EFF, uMnuz Julius Malema, uNgqongqoshe eHhovisi likaMenangameli, uNkk Sindisiwe Chikunga, uMphathiswa wezokuBusa ngokuBambisana neziNdaba zoMdabu, uMfu Thulasizwe Buthelezi, noNdunankulu waseGauteng, uMnuz Panyaza Lesufi.
Udwendwe beluphethwe abenkonzo yamaNazaretha. INdlulamithi yamakhosi noNdlunkulu bangamaNazaretha.
IBHOKISI lomgcagco kaNdlunkulu Nomzamo Myeni
Image: NQUBEKO NDLELA/ FACEBOOK