Usenkingeni oqambe amanga kwekaMadlanga
U-BRIGADIER Lesiba Mokoena
Image: Oupa Mokoena/Independent Newspapers
USOBISHINI usigagxamabhande wophiko loKlebe owabanjwa eqamba amanga phambi kwekhomishini ephenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi.
IKhomishini yeJaji uMbuyiseli Madlanga imfunisa okomsebenzi uBrigadier Lesiba Mokoena owabanjwa eqamba amanga ngesikhathi evele phambi kwekhomishini ngeledlule.
UMadlanga uthe bafuna ukuthi uMokoena aphinde azophekwa ngemibuzo phambi kwekhomishini. Ukusho lokhu ngesikhathi kuqhubeka ukulalelwa kobufakazi.
UMokoena uyingxenye yamaphoyisa ophiko loKlebe asolwa ngokuzama ukuphazamisa ukuboshwa kukasomabhizinisi obhekene noxhaxha lwamacala, uMnuz Katiso "KT" Molefe, kanti wakhipha umyalelo wokuba amaphoyisa angaphansi kophiko loKlebe aye emzini kaMolefe ngosuku aboshwa ngalo eboshelwa icala lokubulala unjiniyela, uMnuz Armand Swart.
Ngesikhathi evele phambi kwekhomishini ngeledlule, uMokoena wabuzwa ngomyalezo awubhala eqoqweni likaWhatsApp okwakuxoxa kulo amaphoyisa ophiko loKlebe ayejutshwe emzini kaMolefe.
UMokoena waphika ukuthi ukhona umbhalo awufaka kuleli qoqo kodwa ikhomishini yamvalela ekhoneni, yamkhombisa imibhalo ayifaka.
UMokoena wagcina evumile ukuthi kukhona akubhala kuleli qoqo. Izolo, uMadlanga uthe bafuna ukuthi uMokoena abuye.
"Mangakanani amathuba okuthi singakwazi ukumthola maduze?"
Ohola ofakazi, u-Advocate Lee Segeels-Ncube, uthe bake bazama ukumthola uMokoena kodwa wabhala wacisha.
"Usitshele ukuthi akakwazi ukuvela phambi kwekhomishini okwamanje, usalinde ukuxoxa nabameli bakhe. Uthe akaqondi kahle ukuthi njengoba sifuna ukuthi abuye ngabe usewumsolwa yini?"
Izolo, ikhomishini iqhubekile nokupheka ngemibuzo amaphoyisa angaphansi kophiko loKlebe.
UWarrant Officer Sabelo Nkosi uthe sasingekho isidingo sokuba bajutshwe emzini kaMolefe.
UNkosi uthe kwakungathunyelwa amaphoyisa asesiteshini esiseduze nomuzi kaMolefe.
"Ngesikhathi ngifonelwa kwakufanele siye kokwenza uphenyo eNorth West. Ngangikude kakhulu mina nomuzi kaMolefe ngesikhathi ngitshelwa ukuthi angijike. Mhlawumbe ngangikude ngebanga elingu-60km. Angikholwa ukuthi isiteshi esiseduze sikude ngebanga elingu-20km."
Khonamanjalo: Lizoqhubeka namhlanje ikomiti lasePhalamende eliphenya izinsolo ezifanayo.
Phakathi kwabantu abazokwethula ubufakazi kuleli sonto, yiPhini likaNgqongqoshe wamaPhoyisa, uNkk Polly Bhoshielo noNgqongqoshe wamaPhoyisa obambile, uSolwazi Firoz Cachalia.