Iqale phansi eyombango wezikhundla kwiMK

UQALE phansi umdonsiswano wezikhundla eqenjini eliholwa ngowayengumengameli, uMnuz Jacob Zuma, njengoba kukhona amalungu eqembu afuna kuxoshwe uSotswebhu oMkhulu ePhalamende, uNkk Colleen Makhubele. 

UNkk Makhubele weqembu uMkhonto weSizwe (MK) ubhekene nezinsolo eziningi okubalwa kuzo ukungaphumeleli embikweni ngesikhathi ehlolelwa ukuthi ukulungele yini ukuba yilungu lekomiti lasePhalamende elibhekelele ukusebenza kwezinhloli.

Iziko lezindaba elinguzakwabo weSolezwe, i-IOL, libike ukuthi uNkk Makhubela akazange ephumelele ngesikhathi ehlolwa ukuthi ukulungele yini ukugcina izimfihlo ezibucayi okukhulunywa ngazo emihlanganweni yekomiti.

UNkk Makhubele usolwa nangokushaya indiva imiyalelo yomholi weqembu ePhalamende, uDkt John Hlophe, aphinde asolwe nangokuzama ukwenzelela ekuqashweni kwenkampani yomyeni.

Izinsolo ziqukethwe embikweni wangaphakathi kwiMK.

Umbiko uphakamisa ukuthi iNkk Makhubele amiswe esikhundleni kuze kuba kuphothulwa uphenyo ngezinsolo abhekene nazo.

Okhulumela iMK, uMnuz Nhlamulo Ndhlela, uvumile ukuthi ukhona umbiko okhona othinta igama likaNkk Makhubele kodwa wathi ubungakathulwa ngokusemthethweni.

"Akukho-ke engingakuphawula njengoba umbiko ungakethulwa ngokusemthethweni."

Kuthiwa kunamalungu eMK afuna ukuthi uNkk Makhubele akhishwe esikhundleni, kuthiwa udaba seluze lwabikwa ngisho nakuZuma.

Akukhona okokuqala kuba nemizamo yokukhipha uNkk Makhubele kulesi sikhundla. NgoJulayi, amalungu eMK ePhalamende abhalela uZuma emcela ukuba axoshe uNkk Makhubele.

Amalungu eMK anganelisekile akhala ngokuthi uNkk Makhubele uwundlovu kayiphikiswa, amsola nangokungawazi umsebenzi. Wakwazi ukusinda njengoba agcina engaxoshwanga. Akucaci ukuthi uzophinde asinde yini nakulesi sivunguvungu abhekene naso.

UNkk Makhubele wathatha lesi sikhundla ngoMeyi, kulandela ukuxoshwa kukaMnuz Mzwanele Manyi. UManyi waxoshwa kulesi sikhundla engakaqedi ngisho nonyaka. Naye wayekade esithathe kuMnuz Sihle Ngubane, naye owasiphatha izinyanga ezimbalwa.

I-MK iyaziwa ngokukhipha abaholi ezikhundleni kodwa bekusa the ukuthula kulezi zinsukwana.