EzaseKZN zimele elakuleli emqhudelwaneni wase-USA

IZIHLABANI zaKwaZulu-Natal ziyingxenye yamaciko akuleli aqokwe emqhudelwaneni wezindondo waphesheya kwezilwandle, i-African Entertainment Awards, USA (AEUSA).

Kulo mncintiswano ozobanjelwa eNew York, eMelika ngoDisemba 20 kuboshelwe umrepha waseLovu, uNsikayesizwe "Nasty C" Ngcobo, umlingisi waseMgungundlovu uThuso Mbedu, usaziwayo waKwaNdengezi uPearl Thusi, usaziwayo waseDannhauser uNtombezinhle "DJ Zinhle" Jiyane, umculi wamapiano waseThekwini uNolwazi "Nkosazana Daughter" Nzama, usaziwayo uKhanyi Mbau oyindodakazi kasomatekisi ongasekho uMenzi Mchunu waseNkandla noZandile "Doja Cat" Dlamini oyindodakazi kaDumisani "Chester" Dlamini wodumo kwiSarafina nakwiYizo Yizo 2 odabuka eMlaza .

UNasty C uqokwe emunxeni weBest Hip Hop/Rap Artist lapho edlana khona imilala noNtokozo "KO" Mdluli waseMpumalanga noSenzo "Kwesta" Vilakazi nabanye omrepha bakwamanye amazwe. UPearl Thusi utholene phezulu noBonang Matheba nabanye kwiMedia Personality of the Year. UThuso uqhathwe noCharlize Theron noConnie Ferguson.

UKhanyi usemunxeni weReality TV Star of the Year. UNkosazana Daughter uqokwe kwi-Album of the Year. UDJ Zinhle udlana imilala noKabza De Small kanye noMaphorisa kwiBest DJ. 

Abanye bakuleli abaqokiwe ngoTyla okwiBest Female Artist, Tyler ICU okwiBest Male Artist, Nkuli Nkosi ongene kwi-Entertainment Manager of the Year, Mduduzi Mabaso okwiBest Male Actor, Laduma Ngxokolo weMaxhosa Africa okwiBest Fashion Designer, Maphorisa  kwiMusic Producer, Master KG kwiMusic Producer, Best Male Artist ne-Artist of the Year, Banele Ndaba noSeemah Mangolwane abakwiDigital Content Creator, Boity Thulo okwiSocial Media Influencer, Benjamin Dube okwiBest Gospel Artist, Makhadzi noTyla kwiBest Female Artist- East/South/North Africa noMusa Keys okwiRising Star.