Babhekene namanye amacala anzima ababoshwe neNkosi yakwaZuma
UMNUZ Thabo Mathonsi Chonco obhekene noxhaxha lwamacala okubulala
Image: Sigciniwe
UMNUZ Thembelani Mbatha obhekene namacala okubulala
Image: Sigciniwe
ABASOLWA ababili ababoshwe neNkosi Simphiwe Erick Zuma, babhekene namanye amacala okubulala aqulwa eNkantolo eNkulu eMgungundlovu.
Ngaphandle kokuhamba amacala ababoshwe kuwo noZuma, uMnuz Thabo Mathonsi Chonco noMnuz Thembelani Mbatha, baphinde begqigqe ezinkantolo ngamanye amacala okuqotha abantu.
UChonco noMbatha bavele kafushane eNkantolo yeMantshi eHowick, ngoLwesine.
UChonco uqale wavela ecaleni lokubulawa kowayeyikhansela leDA kuMasipala waseMngeni.
Kuthiwa uChonco walihlangansa esejele itulo lokubulawa kukaNdlovu.
UChonco uphinde wavela kafushane ngecala lokubulala owayelwa nokudayiswa komhlaba kamasipala eMpophomeni, uMnuz Xolani Ndlovu/Ntombela.
Kuleli cala uboshwe noMbatha. Womabili amacala ahlehliselwe uNovemba 6.
UChonco benoMbatha bahamba icala lokuqothwa kwamalungu omndeni wakwaMemela.
Amalungu omndeni wakwaMemela ayishumi aqothwa ngonyaka odlule elokishini Imbali Unit 14, ngonyaka odlule.
Emalungwini adutshulwa ekuseni kwakukhona nezingane ezinhlanu.
UChonco uphinde ahambe icala lokuqotha amalungu amahlanu omndeni waseBulwer.
Kuleli cala uselinde isigwebo njengoba selimlahlile.
UMbatha uphinde abhekane necala lokubulala owayeyikhansela le-ANC, uMnuz Mabhungu Mkhize. UMkhize wabulawa ngo-2023, elokishini Imbali Unit 14.
Nabanye abasolwa ababoshwe noZuma, uMnuz Thobani Masobho Hlongwa noMnuz Khayelihle Shabalala, basolwa ngokuba yingxenye yeqembu lemigulukudu elihlalise lubhojozi abantu eMgungundlovu.
Nakuba engekho amanye amacala ahanjwa wuHlongwa noShabalala, uMbuso wenza izinsolo zokuthi bayingxenye yeqembu lemigulukudu. Lezi zinsolo zenziwa wuMbuso ngesikhathi uphikisa isicelo sokuthi badedelwe ngebheyili.
Umsolwa osephenduke ufakazi woMbuso, uMnuz Zwelithini Buthelezi naye unezigemegeme zakhe. UButhelezi uphinde abe wumsolwa ecaleni lokubulawa kukaQalokunye.
Uke waboshelwa icala lokutholakala nesiphehlimandla sikagesi esintshontshiwe.
Ngaphambi kokuthi aboshwe uke wadlala umacashelana namaphoyisa kwaze kwaphela unyaka.