Umnyango uchitha umhlangano owaketula ubuholi baseMvoti

ISIPHINDE yahlangabezana nenye imbibizane i-ABC ne-ANC abazama ukuketula ubuholi be-IFP kuMasipala waseMvoti.

UMnyango wokuBusa ngokuBambisana neziNdaba zoMdabu uchithe umhlangano okwathathwa kuwo isinqumo sokuketula imeya, uMnuz Zamani Malembe, nephini lemeya, uMnuz Mbongiseni "Bhojasi" Dlamini.

Isinqumo sokukhipha uMalembe noDlamini sathathwa emhlanganweni owawungoLwesihlanu.

Lo mhlangano wawuhanjelwe amakhansela e-ABC ne-ANC. Amakhansela ayesemhlanganweni aqoka ikhansela le-ABC, uMnuz Mfundo Masondo, njengemeya entsha, kwathi ikhansela le-ANC, uNksz Nomvula Masikane, laqokelwa kwesephini lemeya.

Umhlangano wangeledlule ubizwe emva kokubhuntsha komhlangano owawubizwe emasontweni amabili edlule ukuba kuzobhungwa ngesiphakamiso sokungabethembi ubuholi bukaMalembe noDlamini.

Umhlangano wabhuntsha ngenxa yokungafiki kwamakhansela ayisibalo esanele ukuba kube nomhlangano.

UMphathiswa wokuBusa ngokuBambisana neziNdaba zoMdabu, uMfu Thulasizwe Buthelezi, uthe awukho emthethweni umhlangano wangeledlule.

UButhelezi uthe umhlangano kwakungafanele ube khona ngenxa yokuthi nakuwona amakhansela afika ayengesona isibalo esanele ukuba kube noumhlangano.

Ukusho lokhu encwadini ayibhalele uSomlomo, uNkk Ntombi Ngubane.

Ngokuthola kweSolezwe kwafika amakhansela angu-13 kuphela emhlanganweni wangeledlule.

UMasipala waseMvoti unezihlalo ezingu-27, okusho ukuthi kufanele kufike amakhansela angu-14 ukuze kube nomhlangano.

Umthombo uthe amakhansela e-IFP ayengekho wonke emhlanganweni, kanti amabili e-ANC nawo ayengekho.

"Elinye (ikhansela le-ANC) lathi alikho lapha KwaZulu-Natal. Elinye lakhala ngokuthi lidukelwe yizinkomo zalo, lalisemahlathini lizibhekela izinkomo zalo ngosuku lomhlangano."

UButhelezi uthe kwakungafanele siqhubeke isiphakamiso sokungabethembi ubuholi bukaMalembe noDlamini ngoba ikhansela elafaka isiphakamiso, uMasondo, selaxoshwa yiqembu lalo i-ABC.

UMasondo kanye nelinye ikhansela le-ABC, uMnuz Siyabonga Zondi, bathola izincwadi ezibaxoshayo ngaphambi komhlangano owabhuntshayo emasontweni amabili edlule.

"Ngiyakuqaphela ukuthi kuMasipala waseMvoti kunezikhala zamakhansela amathathu. Kulezikhala zamakhansela kubalwa nezikhala ezivuleke emva kokuxoshwa kowafaka isiphakamiso, uMasondo, kanye naloyo oweseka isiphakamiso, uZondi. Umthetho ukubeka kucace ukuthi uma kuxoshwa umuntu ofake isiphakamiso, isiphakamiso siyachithwa."

Umholi we-ABC, uMnuz Philani Mavundla, uzame ukuphonsela inselelo ukuxoshwa kukaMasondo noZondi kodwa isicelo sakhe sahoxiswa ohlwini lwamacala aphuthumayo eNkantolo eNkulu eMgungundlovu.

Okhulumela uMnyango wokuBusa ngokuBambisana neziNdaba zoMdabu KwaZulu-Natal, uMnuz Senzelwe Mzila, uthe uMalembe useyiyona imeya yomkhandlu.

"Uma kukhona omunye ozenza imeya, kuyobe uzididekele noma uzama ukudukisa umphakathi."

Imizamo yokuthola ukuphawula kukaNkk Ngubane ayizange iphumelele njengoba ucingo lwakhe belukhala lungabanjwa futhi engazange ayiphendule imibuzo ayithunyelelwe.