UMatlala noMolefe bebegwazela osigaxamabhande emaphoyiseni: ufakazi
Katiso 'KT' Molefe
Image: Simon Majadibodu/IOL
IZIKHULU zamaphoyisa bezigwazelwa wosomabhizinisi ababoshelwe uxhaxha lwamacala, uMnuz Vusimuzi "Cat" Matlala noMnuz Katiso "KT" Molefe.
Ikhomishini ephenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi, itshelwe kabanzi ngokugwazelwa kwamaphoyisa ngesikhathi ilalele ubufakazi izolo.
IKhomishini yeJaji uMbuyiseli Madlanga izwe ukuthi umphathi wabaphenyi eGauteng, uMajor General Richard Shibiri, wayethola imali kuMatlala.
Lokhu kuvezwe umphenyi wecala oyingxenye yamaphoyisa avusa inyamazane ecaleni elaholela ekuboshweni kukaMatlala noMolefe. UShibiri ungomunye wabantu abasolwa ngokusebenzisana nemigulukudu.
UShibiri usolwa ngokuzama ukunxenxa abaphenyi becala eligcine libophisa uMatlala ukuba bamukele intshontsho alibiza ngemvilophu.
Ufakazi igama lakhe eligodliwe uthe banemiyalezo yeWhatsApp ekhombisa ukuxhumana phakathi kukaShibiri noMatlala.
"Ngabuya ngathola ukuthi ubudlelwano babo bujule ngendlela emangalisayo njengoba bebuye benikane imali. Ngabe sengiyabona ukuthi kungani uShibiri ebenza zonke lezi zinto abezenza, okubalwa kuzo nokuthi athi asithathe izimvilophu."
Ufakazi uphinde waveza ukuthi esinye isikhulu samaphoyisa salethela uMolefe izibiliboco nezingubo zokugqoka ngesikhathi esejele.
Ufakazi uthe watshelwa ukuthi umphathi wamaphoyisa esifundeni iSedibeng, eGauteng, uBrigadier Mbangwa Nkhwashu, walethela uMolefe ukudla ejele ngesikhathi eboshelwe icala lokubulala unjiniyela okwakusolwa ukuthi nguyena owabika inkohlakalo eyayenzeka eTransnet, uMnuz Armand Swart.
"Umphathi wejele wangitshela ukuthi uNkhwashu kade efikile ejele ezolethela uMolefe ukudla nezimpahla zokugqoka."
Ufakazi uthe uNkhwashu wafika ejele ehamba ngemoto engenayo i-number plate.
"Akazange avunyelwe ukuba ayobona uMolefe. Ngatshelwa ukuthi nakho ukudla lokho nezingubo zokugqoka azizange zifike kuMolefe."
Vusimuzi 'CAT' Matlala.
Image: Itumeleng English/Independent Newspapers
Ufakazi uthe uNkhwashu wazama ukuphazamisa uphenyo ecaleni likaMolefe.
Uthe uNkhwashu waqala wafuna ukunikwa idokodo lecala likaMolefe kodwa akangalithola ngenxa yokuthi lase lidluliselwe kumshushisi wecala.
"Kwafika uzakwethu ezongitshela ukuthi uNkhwashu ufuna ukuthi singasiphikisi isicelo sebheyili ecaleni likaMolefe. Lokhu akuzange kwehle kahle kumina. Angazanga ukuthi kungani wayengafuni ukuthi siphikise isicelo sebheyili njengoba uMolefe wayeboshelwe icala elibucayi futhi sasiphethe ubufakazi obuqinile."
Ufakazi ufikelwe umunyu ngesikhathi echaza ngobunzima ababhekane nabo ngesikhathi bephenya icala.
"Besithola izinsongo zokufa. Kwaze kwaphoqa ukuthi sihlinzekwe ngabaqaphi. Kwase kufana nokuthi sisejele njengoba sasihlezi sigadiwe ubusuku nemini."
Ikhomishini izoqhubeka namhlanje.