Sekuyigema likaMacingwane esigqikini samalahle

WONKE amehlo azokube ethe njo kuNgqongqoshe wamaPhoyisa omisiwe, uMnuz Senzo Mchunu, ozothola ithuba lokuqala lokuziphendulela ezinsolweni zokuthi usondelene nezigebengu eziphazamisa ukusebenza kwamaphoyisa.

UMchunu uzothola ithuba lokuziphendulela namhlanje uma esevela phambi kwekomiti elikhethekile lasePhalamende eliphenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi.

Usihlalo wekomiti, uMnuz Soviet Lekganyane, uthe uMchunu uzovela phambi kwekomiti izinsuku ezimbili.

"Uzokube ephendula imibuzo yohola ofakazi (u-Advocate Norman Arendse). Ngosuku olulandelayo uzokube esephendula imibuzo yamalungu ekomiti."

UMchunu kulindeleke ukuthi aphendule izinsolo zokuthi kukhona imali ayithola kusomabhizinisi obhekene noxhaxha lwamacala, uMnuz Vusumuzi "Cat" Matlala.

Kubhekwe ukuthi abuzwe ngobudlelwano bakhe nomuntu amchaza njengeqabane lakhe, uMnuz Brown Mogotsi, okuthiwa unobudlelwano noMatlala.

UMchunu kubhekwe ukuthi aphinde abuzwe nangokuhlakazwa kwethimba lamaphoyisa eliphenya ukubulawa kosopolitiki KwaZulu-Natal.

UKhomishana wamaPhoyisa kuzwelonke, uLieutenant General Fannie Masemola noMkhwanazi bahlaba bahlikiza isinqumo sikaMchunu sokuhlakaza ithimba ngesikhathi bevele phambi kwekomiti.

UMasemola noMkhwanazi bathi uMchunu akanawo amandla okuhlakaza ithimba, bakhala nangokuthi sasingekho isidingo sokuthi kuhlakazwe ithimba ngenxa yokuthi belenza umsebenzi oncomekayo njengoba bebaningi abantu ababoshwe yithimba.

Ngesikhathi epheka uMasemola noMkhwanazi ngemibuzo, u-Arendse waveza ukuthi uMchunu uzotshela ikomiti ukuthi wakhipha umyalelo wokuba kuhlakazwe ithimba ngenxa yokuthi wathola izikhalo ngokusebenza kwalo.

U-Arendse uveze ukuthi uMchunu ugabe ngencwadi ayithola kumhlaziyi wobugebengu, uSolwazi Mary De Haas. Uthe uMchunu uzophinde akhale ngokuthi ukuba khona kwethimba bekudla umnyango izigidi zamarandi.

IPhini likaKhomishana wamaPhoyisa kuzwelonke, uLieutenant Shadrack Sibiya, nalo likhale ngokuthi iningi imali ebisetshenziswa yithimba. Likusho lokhu ngesikhathi livele phambi kwekomiti.

Izolo, amalungu ekomiti abambe umhlangano lapho khona abebonisana ukuthi ibaphi abanye ofakazi okufanele babizwe ukuba bazophendula imibuzo.

Kulo mhlangano obusebusuku, amalungu ekomiti abezophinde athulelwe umbono wommeli ngodaba lokuthi kufanele yini ilungu le-MK, uMnuz David Skosana, livunyelwe ukuba lipheke uMchunu ngemibuzo.

Lokhu kungenxa yokuthi uSkosana wavulela uMchunu icala lokudukisa iPhalamende.