Kubhuntshe umhlangano wokuketula i-IFP eMvoti

KUBHUNNTSHE umhlangano obubizelwe ukuzolalela isiphakamiso sokungabethembi ubuholi be-IFP kuMasipala waseMvoti.

Umhlangano obuzolalela isiphakamiso sokungabethembi ubuholi bemeya, uMnuz Zamani Malembe, iphini lemeya, uMnuz Bongumusa "Bhojasi" Dlamini, kanye nosihlalo wekomiti elibhekele ukusebenza kwemali yomphakathi, uMnuz Vusumuzi Zondi, ugcine uchithwa ngenxa yokungafiki kwamakhansela abefuna kukhishwe laba baholi abangamakhansela e-IFP.

Isiphakamiso sokungabethembi ubuholi bamakhansela besifakwe amakhansela eqembu elike lawuphatha uMasipala waseMvoti, i-ABC.

Usomlomo, uNkk Ntombi Ngubane, ugcine ewuchitha umhlangano ngenxa yokungahlangani kwesibalo esanele samakhansela emhlanganweni wayizolo.

Isolezwe lithole ukuthi abaholi be-ABC bavele baxabana bodwa ngaphambi komhlangano.

Umthombo utshele Isolezwe ukuthi ngaphambi komhlangano kuxoshwe amakhansela amabili e-ABC.

Amakhansela axoshiwe yiloyo obegaqele isikhundla sobumeya, uMnuz Mfundo Masondo, kanye noMnuz Siyabonga Zondi.

"Kuvele kwaphazamiseka yonke into ngesikhathi kuxoshwa amakhansela amabili ngaphambi kokuthi kuqale umhlangano."

UMasondo noZondi kuthiwa baxoshwe wuhlangothi oluphikisana nomsunguli weqembu, uMnuz Philani Mavundla.

Kunombango osezinkantolo ngodaba lobuholi be-ABC njengoba kunohlangothi olungahambisani noMavundla oluthi yilona oluphethe iqembu ngokusemthethweni.

"Izimpi zidla lubi kwi-ABC. Mhlawumbe abahambisana noMavundla bazoya enkantolo, asazi."

Umthombo uthe okunye okwenze umhlangano wayizolo ugcine ubhuntsha wukungavumelani kwe-ABC ne-ANC ngodaba lwesikhundla sobumeya.

Alikho iqembu elinezihlalo ezanele ukuba lingabusa ngokuzimela kuMasipala waseMvoti.

I-ABC ibinethemba lokuthi izokwesekwa yi-ANC esiphakamisweni sayo.

Umthombo uthe abemaningi amathuba okuthi i-ANC yeseke isiphakamiso se-ABC ngenxa yokuthi ifuna ukubuyisa izinduku kwi-IFP.

I-IFP isanda kuketula ubuholi be-ANC kuMasipala wesifunda uMkhanyakude.

"I-ANC ifuna ukuzwisa i-IFP ubuhlungu ebuzwile nayo ngesikhathi ikhishwa eMkhanyakude."

Umthombo uthe inkinga wukuthi kube nokungavumelani phakathi kwe-ANC ne-ABC ngokwabiwa kwezikhundla.

Imizamo yokuthola ukuphawula kukanobhala jikelele we-ABC, uNkk Phumelele Phahla, ayizange iphumelele njengoba ucingo lwakhe belukhala lungabanjwa.

"I-ANC nayo ibisifuna isikhundla sobumeya. Bagcine bengavumelananga, kwabuye kwaphazamisa nale nto yezimpi zangaphakathi kwi-ABC," kusho umthombo.

I-ABC ike yawuphatha phambilini lo mkhandlu lapho uMavundla ayeyimeya, uMasondo  wayengusomlomo.

Ubuholi be-ABC bakhishwa ngonyaka odlule kulandela isiphakamiso sokungabethembi ubuholi babo.