Ithuba lokuziphendulela kosolwa ngokusebenza nemigulukudu emaphoyiseni
UShadrack Sibiya
Image: Oupa Mokoena / Independent Newspapers
SEKUBHEKWE ishoba lokuziphungela ePhinini likaKhomishana wamaPhoyisa kuzwelonke elisamisiwe, uLieutenant General Shadrack Sibiya, elisolwa ngokuba phambili ekuhlakazweni kwethimba eliphenya ukubulawa kosopolitiki KwaZulu-Natal, i-PKTT.
USibiya uzovela phambi kwekomiti lasePhalamende elikhethekile eliphenya izinsolo zokuthi kukhona amaphoyisa nosopolitiki abasebenzisana nezigebengu.
USibiya uzovela phambi kwekomiti namhlanje nakusasa.
Lezi zindaba zidalulwe usihlalo wekomiti, uMnuz Soviet Lekganyane, ngesikhathi ekhuluma emhlanganweni wekomiti ngoLwesihlanu.
"Ngesonto elizayo, sizohlangana noSibiya, izinsuku ezibekiwe uMsombuluko noLwesibili."
Ngosuku lokuqala uSibiya uzophendula imibuzo yohola ubufakazi, u-Advocate Norman Arendse.
NgoLwesibili, uSibiya uzophendula imibuzo yamalungu ekomitini.
Ngeledlule, phambi kwaleli komiti, kuvele uKhomishana wamaPhoyisa kuzwelonke, uLieutenant General Fannie Masemola noKhomishana wamaPhoyisa KwaZulu-Natal, uLieutenant General Nhlanhla Mkhwanazi.
UMasemola noMkhwanazi batshela amalungu ekomitini ukuthi uSibiya wayephokophele ukuba kuvalwe ithimba. Bathe uSibiya waze wahamba uMasemola ngemumva, wakhipha umyalelo wokuba kuthathwe onke amadokodo ayephenywa yithimba. La madokodo athathwa ayiswa ePitoli, ehhovisi elikhulu lamaphoyisa.
UMkhwanazi uvulele uSibiya nabanye, abasola ngokuphazamisa ukusebenza kwengalo yomthetho, icala ngodaba lokuhlakazwa kwethimba.
Ngeledlule, amaphoyisa aphenya icala agasela emzini kaSibiya, afike ashaqa amaselula nezinye izinto zokuxhumana ngobuchwepheshe.
La maphoyisa aphinde azama ukugasela emzini kaNgqongqoshe wamaPhoyisa omisiwe, uMnuz Senzo Mchunu, kodwa angakwazi ukungena ngenxa yokuthi afica kukhala ibhungezi.
Ngalo isonto eledlule, amaphoyisa agasela emzini wosamisiwe kwesokuba yisikhulu sezisebenzi ehhovisi likaMchunu, uMnuz Cedric Nkabinde.
Khonamanjalo: Izoqhubeka namhlanje ikhomishini ephenya izinsolo ezenziwa uMkhwanazi.
IKhomishini eholwa yiJaji uMbuyiseli Madlanga izokhuza ibuya namhlanje emva kokuthatha ikhefu.
Ikhomishini yathatha ikhefu emva kokuba kugule ufakazi, uLieutenant General Dumisani Khumalo, oyisikhulu sezinhloli ophinde futhi abe umholi wethimba eliphenya ukubulawa kosopolitiki.
UKhumalo wagula ephakathi nobufakazi bakhe, lapho ayeveza khona imiyalezo ekhombisa ukuxhumana kukaMnuz Brown Mogotsi nosomabhizinisi oboshelwe uxhaxha lwamacala, uMnuz Vusumuzi "Cat" Matlala.
Okhulumela ikhomishini, uMnuz Jeremy Michaels, uthe uKhumalo angeke aqhubeke nokwethula ubufakazi namhlanje.
UMichaels uthe bazofaka isicelo sokuthi ubufakazi banamhlanje buthulwe esithe.