ISilo sibabaza ukushelela kukaMntwana uSimakade

ISILO uMisuzulu Sinqobile kaZwelithini sibabaze 'amanga' esithi aqanjwa ogaqele iSihlalo sobuKhosi bukaZulu, uMntwana uSimakade kaZwelithini, emaphepheni asenkantolo ngesikhathi kunecala lombango wesihlalo. 

IMbube ithe uMntwana uSimakade waqamba amanga ngodaba lokufakwa esiswini seNdlovukazi eyayibambe ubukhosi bukaZulu, uShiyiwe Mantfombi Dlamini Zulu. 

Ikusho lokhu ngesikhathi ikhuluma odwendweni lweNkosi Sithembiso Lushaba, oShabeni, ePort Shepstone.

"Angikaze ngiwabone amanga anje enkantolo, phakathi kwesizwe. Ungowakwethu impela ngikhule naye, ethi ufakwe esiswini sikamama wami, ethi yena usengaphezu kwami. Usho umama ongizalayo."

INkantolo yaMacala aDlulisiwe isanda kukhipha isinqumo esivuna iSilo.

Ngeledlule, inkantolo yaguqula isinqumo seNkantolo eNkulu ePitoli, esichitha isinqumo sikaMengameli, uCyril Ramaphosa, sokuvuma ukuqokwa kweSilo.

INkantolo eNkulu ePitoli yayikade inqume ukuthi uRamaphosa akazange ayilandele imigomo ngesikhathi evuma ukuqokwa kweSilo ngo-2022.

URamaphosa wabe esesiphonsela inselelo lesi sinqumo eNkantolo yaMacala aDlulisiswe.

INkantolo yaMacala aDlulisiwe ithole ukuthi uRamaphosa walandela yonke imigomo ngesikhathi evuma ukuqokwa kweSilo.

IMbube ithe lo mbango wesihlalo uthele uZulu ngehlazo. IMbube ithe lesi akusisona isikhathi sokujabula kodwa sathi isikhathi sokubuyisana.

"Ngiyacela sizwe sikaMageba, ngiyakhuleka kunina ngenkulu inhlonipho, ningaqale nijabule. Ngiyacela ningaqale nijabule ngoba silimele isizwe sikaMageba. Silimele, silimele isithunzi sethu. Kulimele isithunzi sesiszwe.

"Akusona isikhathi sokujabula lesi. Lesi isikhathi sokuthi sibuyise imiqondo, kuhlangane imihlathi eyazanayo, sibheke ukuthi kwakwenjani kuze kuyiwe ezinkantolo ekubeni iqiniso lisobala, lizimele lithe gelekeqe."

ISilo sinxuse abasibangisayo ukuba bamukele ukuthi isona esifanelwe isihlalo.

"UMdlokombane uzele, sibaningi. Sasingeke sonke sibe iziNgonyama. Iba yinye iNkosi. Kwakungabe kuyaqala ukuthi kuzothi ngoba nakhu sekuhlezi iNdlulamithi, bese kuthiwa asihlale sonke. Akwenziwa njalo Zulu. Iba yinye inkosi."

Umbango wesihlalo sobukhosi waqala emva kokukhothama kweSilo uGoodwill Zwelithini kaBhekuzulu ngo-2021.

Indlunkulu ihlukene kathathu njengoba kukhona abeseka iSilo, kube khona abeseka uMntwana uSimakade, bese kuba khona abeseka uMntwana uBuzabazi kaZwelithini.