Kulindelwe amabhomu kuMkhwanazi kuqala uphenyo lasePhalamende

KULINDELEKE ukuthi aphinde adedele amabhomu uKhomishana wamaPhoyisa KwaZulu-Natal, uLieutenant General Nhlanhla Mkhwanazi, uma esethula ubufakazi phambi kwekomiti lasePhalamende elikhethekile.

UMkhwanazi uzokwethula ubufakazi phambi kwekomiti lasePhalamende elizoqala ukulalela ofakazi, ngoLwesibili.

Ikomiti lasePhalamende liphenya izinsolo ezenziwa uMkhwanazi zokusebenzisana kosopolitiki nezigebengu eziphazamisa ukusebenza kwamaphoyisa.

Kuke kwabambezeleka ukulalelwa kobufakazi phambi kwekomiti kungatholakali uMkhwanazi ngenxa yokuthi waqala ngokwethula ubufakazi phambi kweKhomishini eholwa yiJaji uMbuyiseli Madlanga, nayo ephenya izinsolo ezifanayo.

Ohola ubufakazi ekomitini lasePhalamende, u-Advocate Norman Arendse, uthe bazoqala  ukulalela ofakazi kusasa.

Ukusho lokhu ngesikhathi kunomhlangano wekomiti wokucaba indlela obungoLwesihlanu.

U-Arendse uthe isitatimende sikaMkhwanazi azosethula phambi kwekomiti sesilungile.

"UMkhwanazi uyena ozokuba ufakazi wokuqala. Uzokwethula ubufakazi izinsuku ezimbili. Ngosuku lokuqala uMkhwanazi uzokuba echaza ngezinsolo azenzayo, uzokube ebuzwa abahola ubufakazi. Ngosuku lwesibili amalungu ekomitini azothola ithuba lokuba apheke uMkhwanazi ngemibuzo. Kungenzeka emva kwalokho abahola ubufakazi baphinde futhi bahlome uMkhwanazi ngemibuzo, lokho kuzoncika ekutheni kukhona yini okuzodinga ukuthi uMkhwanazi akucacise ezintweni azokuba ezishilo ngesikhathi ephendula imibuzo yamalungu ekomitini."

Emva kukaMkhwanazi kuzolandela uKhomishana wamaPhoyisa kuzwelonke, uLieutenant General Fannie Masemola, ozokwethula ubufakazi ngoLwesine nangoLwesihlanu.

NgeSonto elizayo kuyokube sekulandela iPhini likaKhomishana wamaPhoyisa kuzwelonke, uLieutenant General Shadrack Sibiya.

Abanye abazovela phambi kwekomiti kubalwa uNgqongqoshe wezamaPhoyisa omisiwe, uMnuz Senzo Mchunu, uNgqongqoshe wezamaPhoyisa obambile, uSolwazi Firoz Cachalia nowayengungqongqoshe womnyango, uMnuz Bheki Cele.

U-Arendse uthe abanye ofakazi bazocaca emva kokuvela kukaMkhwanazi.

"Amalungu ekomitini anquma ukuthi abanye ofakazi abazobizwa bazoqinisekiswa emva kokulalela ubufakazi bukaMkhwanazi. Njengamanje silinde ubufakazi bukaMkhwanazi."

Ngesikhathi evele phambi kweKhomishini kaMadlanga, uMkhwanazi wasola uMchunu ngokusondelana nezigebengu eziphazamisa ukusebenza kwamaphoyisa.

Wayamanisa uMchunu nosomabhizinisi obhekene noxhaxha lwamacala, uMnuz Vusumuzi 'Cat' Matlala.

UMkhwanazi noMasemola baphinde bagxeka isinqumo sikaMchunu sokukhipha umyalelo wokuba kuhlakazwe ithimba lamaphoyisa eliphenya amacala okubulawa kosopolitiki KwaZulu-Natal.

UMkhwanazi noMasemola bathi uMchunu akanalo igunya lokuhlakaza ithimba lamaphoyisa.

UMchunu akakalitholi ithuba lokuziphendulela phambi kweKhomishini kaMadlanga.

IKhomishini kaMadlanga isaguqile, izoqhubeka ngesonto elizayo.