Isikaza ukuhoxa eKZN i-ANC eketulwe eMkhanyakude

UKUKETULWA kwe-ANC kuMasipala wesiFunda uMkhanyakude kubhebhezele ukungezwani emaqenjini abusa ngokubambisana isifundazwe iKwaZulu-Natal, iGPU. 

I-ANC isikaza ngisho ukuphuma kuhulumeni wokubambisana ngenxa yokunengwa yisenzo seqembu ebambisene nalo, i-IFP. 

I-IFP ikhiphe abaholi be-ANC abebephethe uMasipala uMkhanyakude ngevoti lokungabethembi ubuholi babo. 

Obeyimeya, uMnuz Siphile Mdaka nobengusomlomo, uMnuz Solomon Mkhombo, bakhishwe ezikhundleni emhlanganweni womkhandlu obungoLwesihlanu. 

Kube sekuqokwa amakhansela e-IFP ezikhundleni zabo.

Amaketango obuMeya agaxwe loyo obeyimeya kaMasipala waseBig 5 Hlabisa, uMnuz Comfort Khumalo, kwathi kwesikaSomlomo kwaqokwa uMnuz Pat Madlopha.

IPhini leMeya eliyikhansela leNFP, uMnuz Thembinkosi Sibiya, libuyiseliwe esikhundleni.

Okhulumela i-ANC KwaZulu-Natal, uMnuz Fanle Sibisi, uthe basazoyifakela izibuko eyokuba ingxenye kahulumeni wokubambisana ophethe KwaZulu-Natal.

USibisi uthe ukujikelwa i-IFP eMkhanyakude kubashiye nemibuzo eminingi. 

"Siyazibuza ukuthi ngabe i-IFP isazimisele yini ukuhlala kuhulumeni wokubambisana noma mhlawumbe kukhona okunye abakuhlelayo emakhosombeni? Sizohlala phansi nobuholi be-ANC esifundeni iNokuhamba Nyawo nobuholi bukazwelonke lapho khona sizocaba indlela eya phambili ngodaba lokubusa ngokubambisana KwaZulu-Natal.

"Ngeke sivume ukudlala abaholi be-IFP. Uma bekhuluma emphakathini bahambe betshela abantu ukuthi kunobumbano kuhulumeni wokubambisana kodwa emakhoneni benza okuhlukile. Abaholi be-IFP kufanele basho uma sebefuna ukuphuma kuhulumeni wokubambisana, bengalokhu becasha ngesithupha."

Ubuholi be-ANC Youth League (ANCYL) KwaZulu-Natal bunxuse ubuholi be-ANC ukuba buphume kuhulumeni wokubambisana ophethe esifundazweni.

UNobhala we-ANCYL KwaZulu-Natal, uNksz Lulama Mabude, uthe akuyisizi ngalutho i-ANC ukuhlala kuhulumeni wokubambisana, wathi kunalokho iyalahlekelwa.

UNksz Mabude uthe i-ANC ibambisane nezitha zayo ezifuna ukuqeda ngayo.

"Sekuyasicacela manje ukuthi amaqembu esibambisene nawo aseqhubeka nombhidlangano wokuqumba phansi i-ANC. La maqembu ayenesivumelwano asisayina ngaphambi kokhetho sokuketula i-ANC. Kusobala ukuthi basaqhubeka lapho.

"Sekukaningi sibona kuphunywa iqhubu nomasipala neminyango ephethwe i-ANC. Inhloso ukuthi kubukeke sengathi abaholi be-ANC bayahluleka ukuphatha omasipala neminyango."

UNksz Mabude uthe ayikho into ebambekayo eyenziwe uhulumeni wokubambisana ngaphandle kwezimpi ezibhekiswe komasipala naseminyangweni ephethwe i-ANC.

"Azikho izindlela ezibambekayo zokuthuthukisa intsha. Umnotho ukhula kancane, awekho amathuba atheni. Sinxusa i-ANC ukuba isabele ikhwelo lokuba iphume kulo hulumeni."