Ihlezi ngesinqa esisodwa i-ANC eMkhanyakude

INGASE ilahlekelwe uMasipala waseMkhanyakude i-ANC njengoba kuzolalelwa isiphakamiso sokungabethembi ubuholi bomkhandlu.

Kungase kushone elakusasa umkhandlu usunobuholi obusha njengoba kubizwe umhlangano ozolalela isiphakamiso sokungabethembi ubuholi bomkhandlu.

Amakhansela anganelisekile afuna kuxoshwe iMeya uMnuz Siphile Mdaka, uSomlomo uMnuz Solomon Mkhombo, nePhini leMeya uMnuz Thembinkosi Sibiya.

UMdaka noMkhombo bangamakhansela e-ANC, uSibiya uyikhansela le-NFP

Isiphakamiso sokungabethembi ubuholi bomkhandlu sesekwa amakhansela e-IFP namanye amaqembu amancane.

Amakhansela anganelisekile asola uMdaka ngokwahluleka ukuhola umkhandlu njengoba ekhala ngokuthi umasipala uyahluleka ukuhlinzeka abantu ngamanzi, uthola imibiko emibi kuMcwaningi Mabhuku Jikelele, nokuthi uyehluleka ukusebenzisa imali osuke uyabelwe.

Esiphakamiswe sawo, amakhansela asola uMkhombo ngokuchema, akhala nangokuthi amakomiti omkhandlu awasebenzi kahle.

Amakhansela anganelisekile abhalele uMphathiswa wezokuBusa ngokuBambisana neziNdaba zoMdabu KwaZulu-Natal, uMfu Thulasizwe Buthelezi, emcela ukuba ahlalise umhlangano okuzobhungwa kuwo isiphakamiso sokungabethembi ubuholi.

UButhelezi ujube iphini lomqondisi jikelele elibhekelele ezokubusa ngokubambisana, uMnuz Madoda Khathide, ukuba liyohlalisa umhlangano uzokuba semahhovisi oMasipala waseBig 5 Hlabisa, kusasa.

Amakhansela abhalela uButhelezi emva kokuba uMkhombo echithe isicelo sawo sokuba abize umhlangano. UMkhombo uvumile ukuthi la makhansela ambhalela ecela kube nomhlangano ozobhunga iziphakamiso sokungabethembi ubuholi bomkhandlu.

UMkhombo uthe isicelo wasichitha ngenxa yokuthi sasingahambisani nemigomo ebekelwe ukuphathwa kwemikhandlu.

"Ngathola isicelo sabo ngoSeptemba 22, becela ukuthi kube nomhlangano ngoSeptemba 25. Umthetho uthi kufanele balethe isicelo sabo kusasele izinsuku ezintathu kushaye lolo suku abafuna ukuthi kuhlale ngalo umhlangano. Okunye engakuqaphelayo ukuthi indlela abanye babo abasayina ngayo akusiyona indlela abajwayele ukusayina ngayo."

UMkhombo uthe kummangazile ukuthi la makhansela avele anquma ukubhalela uButhelezi esikhundleni sokulungisa amaphutha enze ukuba kuchithwe isicelo sawo.

UMkhombo uthe basazonquma ukuthi bazothatha siphi isinyathelo.

Sekunesikhathi eside kunombango ngokuphathwa komkhandlu.

I-IFP inenkolelo yokuthi kufanele engabe iyona ephethe umkhandlu njengoba iphethe yonke imikhandlu engaphansi koMkhanyakude.

I-IFP ikholelwa ukuthi into eyenza ukuba ingawuphathi umkhandlu ukuthi akuzange kubalwe kahle ngesikhathi kwabiwa izihlalo emva kokhetho lohulumeni basekhaya lwango-2021.