ISilo asifuni nokuyizwa eyokuthi amadoda athathe izibongo zamakhosikazi

ISILO uMisuzulu Sinqobile kaZwelithini asifuni nokuyizwa eyokuthi amadoda athathe izibongo zamakhosikazi. 

IMbube iyalele amadoda akwaZulu ukuba angavumi ukuthatha izibongo zamakhosikazi. 

Ikusho lokhu ngesikhathi ikhuluma eMkhosini weLembe, obuKwaDukuza, izolo. 

IMbube ithe ayihambisani nesinqumo seNkantolo yoMthethosisekelo esivumela amadoda ukuba athathe izibongo zamakhosikazi. 

"Ningayivumi le nto, wukonakala lokhu."

Iphini likandunankulu kaZulu, iNkosi Phathisizwe Chiliza, nalo liwugxekile lo mthetho. 

Umkhosi wakulo nyaka ubuhanjelwe nangumholi wamaNazaretha ohlangothini lwaseBuhleni, iNkosi uMduduzi 'Nyazilwezulu' Shembe. 

IMbube noNyazi baphonsele uZulu inselelo yokuba uvuse isigodlo seLembe KwaDukuza. 

IMbube noNyazi bathe kuyoqaqeka amafindo amaningi abophe uZulu uma kungase kuvuswe isigodlo seLembe. 

ISilo sithe kuyihlazo ukuthi ayikho indawo okungashiselwa kuyo impepho uma kubikwa uMkhosi weLembe. 

"Kubalulekile ukuba sivuke isigodlo saKwaDukuza. Ngiyanitshela Zulu omnyama. Niyobona ukuthi kuyokwenzekani uma sivusa isigodlo seLembe. Niyobona izibusiso eziyosehlela uma sivusa isigodlo."

UNyazi luthe kuyaphoqa ukuthi kuvuswe isigodlo seLembe. 

"Njengoba ngilapha ngizonitshela ukuthi musani ukuba yizahluleki. Siphi isigodlo lapha. UKwaDukuza wahamba ngesikhathi kuhamba ILembe. Uyovuka nini lo muzi? Sithule sithini thina? Mhla ehamba uShaka wasishiya nentambo emqaleni. Mhlawumbe leyo ntambo iyokhululeka mhla thina savusa lo KwaDukuza. Niyabona ukuthi sixakekile, siyahlupheka? Wayeshilo mhla ehamba ukuthi sizosasala sihlupheka, angifuni ukuphinda amazwi akhe. Asingavumeli ukuhlulwa ezinye izizwe. Idlinza leNkosi limpintshekile lapha."

UNyazi luthe kuyihlazo ukungavuswa kwesigodlo seLembe ekubeni kuyilo elabumba isizwe.

"Kuyihlazo ukuthi kuphele iminyaka eminingi kangaka lo muzi ungavukile. Umbumbi wesizwe sakwaZulu, owasibumba, wasakha, sahlangana, wasifundisa inhlonipho. Sithuleleni lo muzi ungavukile."

UNyazi luphakamise ukuba uZulu uhlanganisele ipulazi okuzovuswa kulo isigodlo seLembe. 

"Nonke madoda ngiyanithuma ukuba nibuyele emakhosini aniphethe, niwatshele ukuthi uNyazi luniyalele ukuba nivuse isigodlo seLembe. Akekho umuntu ozosivusela lo muzi, yithina esizozivusela wona. Kufanele siqale ngokuthenga elinye lamapulazi lapha. Ziningi izimoba lapha."

Beliyidliva ngesikhathi kunomkhosi. Imvula ayizange iwadikibalise amabutho nezintombi ebezibhikla ingoma. 

IMbube ithe imvula ikhombisa ukuthi umkhosi ubusisiwe.