Ububheke lukhulu kumufi umndeni womshayeli owashiswa nemoto
UBEKWE endlini yakhe yokugcina ngoMgqibelo uSiyanda Mthokozisi Mvelase wasoLundi odlule emhlabeni ngemuva kokudutshulwa aphinde ashiswe eSoweto emasontweni amabili adlule
Image: Facebook
UCHAZWEngumndeni wakhe njengeqhawe umshayeli wezimoto ezikhokhelwa ngebanga ezilihambile, uSiyanda Mthokozisi Mvelase, odutshulwe washiswa eSoweto, enxanxatheleni yezitolo iMaponya Mall, emasontweni amabili edlule.
UMvelase ufihlwe kubo eNhlungwane, oLundi, ngoMgqibelo enkonzweni ebinosizi nebihanjelwe yizikhulu ezihlukene zikahulumeni nosomabhizinisi.
Ukushona kukaMvelase kwathinta abaningi njengoba kusolwa ingxabano eyayphakathi kwabamatekisi nabashayeli bezimoto ezikhokhelwa ngebanga ezilihambile.
UMPHAKATHI waseNhlungwane oLundi obuzophelezela uSiyanda Mthokozisi Mvelase owabulawa eSoweto
Image: Facebook/Icebolethu
Enkonzweni yomngcwabo odadewabo bamchaze njengomuntu obenokuthula engawufuni umsindo.
Bathe okubaphethe kabi wukuthi umfowabo ubeseyithemba lokuthi uzovusa umuzi wakubo kodwa wabulawa enezinsuku ezimbili kuphela eqalile emsebenzini.
Okhulumela omalume bakhe, uMnuz Mlamuli Khuzwayo, uveze ukuthi okubuhlungu nokubakhathazayo wukuthi namanje uphenyo lwamaphoyisa aluyi ndawo.
“Sicela kusheshe uphenyo ngalesi sigameko. Lapho kwashona khona umshana kukhona amakhamera angalusheshisa uphenyo kuboshwe abenzi bobubi. Sicela kubhekwe amakhamera asenxanxatheleni yezitolo ukuze sithole ukuthula emoyeni,” kusho yena.
Omemezela isiminyaminya sezimoto emgwaqweni emsakazweni uKhozi FM, u-Ayanda Msweli, ubonge ukubambisana kwezinhlaka ezihlukene ukuze kugcine kufihleke uMvelase ngesizotha.
Uthe lolu daba lwathinta abaningi luqala ukuvela kwaze kwaba sekugcineni njengoba efihlwa.
I-Santaco KwaZulu-Natal ithe ikhalisana nomndeni futhi nayo ibambisene namaphoyisa ekutheni kutholakale abenzi bobubi.
Ithe yize ingazikhiphi ekutheni abanye babashayeli bayo abenza lokhu kodwa kuyabadida ukuthi uMvelase adutshulwe aze ashiswe nokuyinto abangafuni ukuphinde bayibone yenzeka uma kunezinxushunxushu.