Kudilizwe inkosi enesikhundla ebuholini baseKZN
OBEYINKOSI uNgqayizivele Sithole okhishwe kwesobukhosi
Image: Facebook
KUPHELILE ngombuso wenkosi ebiyiphini likasihlalo wendlu yobuholi bomdabu KwaZulu-Natal, uNgqayizivele Sithole, waseMhlumayo, eMnambithi.
USithole ukhishwe kwesokuba inkosi maqede kwaqokwa iNkosi entsha, uSabelwesihle Simphiwe Sithole.
Imininingwane yokuqokwa kwenkosi entsha iqukethwe encwadini ebhalwe nguNdunankulu waKwaZulu-Natal, uMnuz Thami Ntuli.
Ukukhishwa kukaSithole ekubeni inkosi kusho ukuthi sizomphunyuka nesikhundla sokuba iphini likasihlalo wendlu yobuholi bomdabu KwaZulu-Natal njengoba engeselona ilungu lendlu.
USithole waqokelwa kwesephini likasihlalo wendlu yobuholi bomdabu KwaZulu-Natal, okhethweni olwalungo-2023.
Incwadi ebonwe yiSolezwe iveza ukuthi uSithole ubekade eyibamba bukhosi sonke lesi sikhathi.
Incwadi yazisa uSithole ngokuphela kwesikhathi sakhe njengebamba bukhosi.
"Le ncwadi ikwazisa ngesinqumo esithathwe undunankulu ehlangene nesigungu sakhe esiphezulu, sokwamukela uSabelwesihle Simphiwe Sithole njengeNkosi yesizwe sakwaSithole kusukela ngoJuni 11, ngokwesigaba 8 (3) somthetho wobuholi nokubusa kwendabuko namaKhoisan, ofundwa nesigaba 19(2) somthetho waKwaZulu-Natal, 2005."
UNtuli wazise uSithole ukuthi akaselona ilungu lendlu yobuholi bomdabu esifundeni uThukela njengoba engeselona ibamba bukhosi.
"Kulesi sigaba uhulumeni uthanda ukudlulisa amazwi okubonga ngeqhaza olibambile ekuthuthukiseni isizwe sakwaSithole ngesikhathi usaphethe. Uhulumeni uphinde ukufisele impilo ende."
Okhulumela uhulumeni waKwaZulu-Natal, uMnuz Bongani Gina, uyiqinisekisile incwadi ebhalelwe uSithole.
Okhulumela uMnyango wezokuBusa ngokuBambisana neziNdaba zoMdabu, uMnuz Senzelwe Mzila, uyalele ukuba yonke imibuzo ibhekiswe ebuholini bendlu yomdabu KwaZulu-Natal.
Imizamo yokuthola ukuphawula kukaSithole noSihlalo wendlu yobuholi bomdabu KwaZulu-Natal, iNkosi Sifiso Shinga, kayizange iphumelele njengoba izingcingo zabo bezikhala zingabanjwa.
USithole wangena esikhundleni ngo-2010.
Inkosi entsha, eneminyaka engu-34, kuthiwa yaqala ukuzama ukungena esikhundleni ngo-2015, kanti izalwa uLwazi Sithole, owakhothama ngo-2010.