Bayaveva kubambezeleka ikhomishini ezophenya izinsolo zikaMkhwanazi

BAWOTHA ubomvu ngokubambezeleka kokuqala kwekhomishini ezophenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi.

UNgqongqoshe wezoBulungiswa, uNksz Mmamoloko Kubayi namaqembu ezepolitiki, bagxeke ukubambezeleka kokuqala kwekhomishini eholwa iJaji uMbuyiseli Madlanga, obekufanele iqale umsebenzi wayo ngoMsombuluko.

Izolo, uMadlanga umemezele ukuthi ngeke ikhomishini isaqala ukulalela ofakazi ngoMsombuluko, ngenxa yokwehluleka koMnyango wezoBulungiswa ukuhlinzeka ikhomishini ngengqalasizinda edingakalayo.

Esitatimendeni ithe: "Senza isimemezelo sokuthi sizoqala ukulalela ofakazi ngoSepthemba 1, ngoba sasazi ukuthi sizokube sesiyithole yonke ingqalasizinda esiyidingayo. Ngeshwa ke siyaphoqeleka ukuba sihlehlise."

UNksz Kubayi uthe zizothathelwa izinyathelo izikhulu ezihlulekile ukutholela ikhomishini ingqalasizinda edingekayo.

Umemezele ukuthi uzothathela izinyathelo umqondisi jikelele womnyango, u-Advocate Doc Mashabane nokumiswa kwephini lo mqondisi jikelele, elibhekelele ezobuchwepheshe, uMnuz Jabu Hlatshwayo.

"Uzomiswa emsebenzi kuze kuphothulwe uphenyo."

Uthe inkinga enkulu edale ukubambezeleka kokuqala kwekhomishini ukungabi khona kwengqalasizinda yezobuchwepheshe.

"Okunye nje kube ukwedembesela kwabantu abathile. Ngesikhathi ngaziswa ngale nkinga ngoLwesihlanu isikhathi sase sihambile kakhulu, kwaba nzima ukuba ngingenelele. Ngidumele kakhulu futhi sengixolisile nakumengameli."

Okhulumela i-EFF, uMnuz Sinawo Thambo, uthe ukubambezeleka kokuqala kwekhomishini kuyimizamo nje yokuvikela abantu abathinteka ezinsolweni zikaMkhwanazi.

"Ingakho sinxenxa uMadlanga ukuba ashiye kule khomishini ngoba izongcolisa igama lakhe."

Okhulumela iMK, uMnuz Nhlamulo Ndhlela, uthe basamile ekutheni asikho isidingo sokuba kusungulwe le khomishini.

Khonamanjalo: Ahlehlile amacala abantu ababili ababalwa uMkhwanazi ezinsolweni zokuthi bayingxenye yabantu abaphazamisa ukusebenza kwengalo yomthetho.

Icala elifakwe iPhini likaKhomishana wamaPhoyisa, uLieutenant General Shadrack Sibiya, likhishiwe ohlwini lwamacala aphuthumayo.

USibiya uphonsela inselelo ukumiswa kwakhe, ufake icala eNkantolo eNkulu ePitoli.

Icala likasomabhizinisi, uMnuz Vusimuzi "Cat" Matlala, lona lihlehliselwe isonto elizayo.

UMatlala ubhekene namacala ehlukene okubalwa kuwo nelokuzama ukubulala.

Onke amacala abhekene noMatlala azohlanganiswa, bese equlwa eNkantolo eNkulu eGoli.