UMasipala waseMkhanyakude usuphenduke umnqakiswano

KUNZIMA kuMasipala wesiFunda uMkhanyakude njengoba i-ANC ne-IFP beqhubeka nokuphikisana ngodaba lokufakwa kwalo mkhandlu ngaphansi kweso lomlawuli.

La maqembu abambene ngezihluthu njengoba lingekho elifuna ukugoba uphondo embangweni osuswe yisinqumo seKhabhinethi yaKwaZulu-Natal, sokufaka umasipala ngaphansi kweso lomlawuli.

I-ANC ne-IFP bayingxenye yohulumeni wokubambisana ophethe iKwaZulu-Natal.

Ukungavumelani kwala maqembu ngodaba lokufakwa komkhandlu ngaphansi kweso lomlawuli, sekuholele ekuvalweni kwamahhovisi omkhandlu.

Amahhovisi omkhandlu aqale ukulenga ukhiye ngasekuqaleni kwenyanga eyedlule ngesikhathi kwethulwa umlawuli, uMnuz Bamba Ndwandwe.

NgoLwesithathu, kusuke uthuthuva ngesikhathi amalungu e-IFP ebhikisha, efuna kuvulwe amahhovisi.

Amalungu e-IFP afike athibelana namalungu enyunyana yabasebenzi edlelana ne-ANC, iSamwu. Amalungu eSamwu ayaphikisana nokujutshwa kukaNdwandwe.

Osebuholini be-IFP esifundeni uMkhanyakude, uMnuz Makhosonke Sithole, uthe inkohlakalo inuka phu kuMasipala wesiFunda uMkhanyakude.

USithole uthe labo abaphikisana nokufakwa komasipala ngaphansi komlawuli bavikela abantu abathinteka enkohlakalweni.

"Lapha eMkhanyakude sizokhalaza ngokubhubhudlwa kwemali yomkhandlu. Ayilandelwa imithetho lapha eMkhanyakude. La bantu abavimbile lapha bavimbe ngoba phela bangamalungu e-ANC, bahlulwa ukhetho bekade bemele i-ANC. I-ANC yabe isibaqasha ukuba babe abasebenzi bomkhandlu. Baqashwa ngaphandle kokulandelwa kwemithetho."

USithole uthe ukuvalwa kwamahhovisi kuphazamisa ukuhanjiswa kwezidingo.

"Sifuna ukuthi kuvulwe amahhovisi khona umasipala uzokwazi ukuqhubeka nokusebenza. Siyaphikisana nale nto eyenziwa ubuholi be-ANC yokuvimba umlawuli. Umlawuli kufanele avunyelwe ukuba enze umsebenzi wakhe. Umlawuli ulethwe lapha ngenxa yokuthi kunezinkinga ezikhungethe umkhandlu. Angeke zilungiseke lezi zinkinga uma umlawuli engavunyelwa ukuba enze umsebenzi wakhe."

Kunecala elifakwe umasipala eNkantolo eNkulu eMgungundlovu, lapho uphikisana nokufakwa ngaphansi kweso lomlawuli. Inkantolo ayikasikhiphi isinqumo kulolu daba.

IMeya yomkhandlu, uMnuz Siphile Mdaka, ithe akekho umlawuli abazomvumela ukuba angene emkhandlwini.

"Ngeke sivume ukubanjwa ngobhongwane ngento ephambene nomthetho."

UMdaka uthe bazoqhubeka nokulwa nokufakwa komkhandlu ngaphansi kweso lomlawuli.

"Ngeke siyiyeke le mpi. Uma i-IFP ifuna ukuthi siyikhombise ukuthi singayehlula, sizoyikhombisa lapha eMkhanyakude."