Ngeke simile imbuya isakhiwo sezintombi esiseNyokeni: ISilo

SEHLISE amaphaphu iSilo uMisuzulu Sinqobile kaZwelithini, ngesakhiwo sezintombi sezigidi zamarandi esakhiwe esigodlweni eNyokeni, esithe ngeke sisale singasetshenziswa njengoba uMkhosi woMhlanga usuthuthele esigodlweni esisha eMashobeni.

IMbube ithe lesi sakhiwo sika-R154 million esisanda kuphothulwa eNyokeni, sizosetshenziselwa ukwenza eminye imicimbi.

Sikusho lokhu ngesikhathi sikhuluma nabaNtwana basendlunkulu esigodlweni, KwaKhangelamankengane, izolo.

Inhloso yesakhiwo esisha ukonga imali esetshenziswa ukuqashela izintombi amatende uma kunoMkhosi woMhlanga. Isakhiwo sinendawo ekwazi ukuhlala abantu abangu-2 000, izindawo zokushintsha, amahhovisi nendawo yokupaka izimoto.

Isinqumo seSilo sokuthutha uMkhosi woMhlanga sishiye abaningi benemibuzo ngekusasa lalesi sakhiwo.

ISilo sithe isakhiwo esisha sizoqhubeka sisebenze uma kuneminye imicimbi yasendlunkulu.

"Asikho isakhiwo sikahulumeni lapha endlunkulu esake saphenduka undingasithebeni. Lesi sakhiwo simele ubuhlobo phakathi kukahulumeni nendlunkulu. Baningi abantu abasazofika befisa ukukhangisa amabhizinisi abo. Singakwazi ukwenza imibukiso kulesi sakhiwo."

Uthe: "Kuzokuba nemali engeke ize kuMisuzulu kodwa ezongena esikhwameni sendlunkulu. Ngoba lokho kumele sikuhlukanise nina beNdlovu. Angithandi ukufaka isandla sami ezintweni zendlunkulu. Kufana nalezi zinto zamafa kaMdlokombane. Kangingeni ngoba akusikhona okwami, okukaMdlokombane nomndeni wakhe ngokwesihlalo. Lesi sakhiwo esendlunkulu, singesenu boNdaba. Okufanele sikubonge ukuthi lesi sakhiwo sisihlanganisa sonke."

IMbube ithe labo abakhalazayo baqhamuka kobunye ubukhosi obumonazela ubukhosi bukaZulu ngokuthi bakhelwe isakhiwo esingaka uhulumeni.

IMbube ithe baningi abafuna ukuzifanisa noZulu.

"Laba bantu baphuma ebukhosini nabo. Bafisa ukuthola okufanayo nalokhu okutholwa ithina. Iminwe ayilingani boNdaba, uNkulunkulu wakwenza ngamasibomu lokho. Baningi ke abathi uNkulunkulu wenza into engalungile, kwakufanele yonke iminwe ilingane."

Khonamanjalo: Okhulumela iSilo, uMntwana uThulani Zulu, ubuye wachitha imibiko yokuthi iSilo sifuna abantu basinikelele ngo-R10.

Isiphakamiso sokuthi uZulu unikelele iMbube ngo-R10, senziwa abeluleki bayo iMbube, uSolwazi Jabulani Maphalala, noMnuz Philani Mavundla.

Lesi siphakamiso basenza emva komsindo owadalwa ukususwa koMkhosi woMhlanga eNyokeni.

UMntwana uThulani uthe uMaphalala noMavundla abazange basixoxe isiphakamiso sabo neMbube, wathi futhi abagunyaziwe ukuba bacelele iMbube iminikelo.