UMs Classic uthembisa lukhulu ekhonsathini yakhe

UMSAKAZI wohlelo lomculo ongasoze wabuna kwiHighway Radio 101.5 FM  yasePinetown, uBongiwe "Ms Classic" Msomi, uthembisa lukhulu kwiTwosday Concert eCentre for Jazz and Popular Music e-UKZN, eHoward College, eThekwini ngoLwesibili ngo-5 ntambama.

Lo mzwilili, osakaza uhlelo oluthi Ulozolo noSipho Mtshali ngemiGqibelo phakathi kuka-7 no-9 ebusuku, uthe kule khonsathi uzobe eqhulula izingoma ze-jazz neze-pop ezidumile. "Ngizokwenza izingoma abazithandayo zabaculi abadumile ezinjengekaThandiswa Mazwai ethi Awukho Umuzi Ongenakukhuluma Kwawo, ekaBusi Mhlongo ongasekho nePromises kaBrenda Fassie naye ongasekho. Kwezaphesheya  kuneShinny Stackings  noL_O_V_E kuma-jazz standards nezami ezimbili ezikhona ezitolo eziwu 40 njengoMs Classic ezithi Never Give Up nethi Ndimufumakhandzi."

UMs Classic ngomunye wabaculi bakulesi sifundazwe abanekhono eliyisimangaliso njengoba ekwazi ukucula zonke izinhlobo zomculo kusukela emculweni wamakhwaya, classical music, pop music, Afro blue-jazz nomculo wokholo. Useke wahlabana emiqhudelwaneni eminingi okubalwa kuyo oweJazz In the Art Award e-Shaka Marine.

Ikhono lakhe selaziwa ngisho naphesheya kwezilwandle njengoba eke wahambela emadolobheni ayisithupha ase--Europe neGauteng Choristers ngo-2006. Naleli khwaya babenza umsebenzi kaSolwazi uMzilikazi Khumalo osihloko sithi UShaka Requiem, ebambe iqhaza nemizwilili enjengo Sibongile Khumalo noSibongile Mngoma. UMs Classic uke wagcwalisa eyedwa iSibaya Casino, iStable Theatre futhi wabamba iqhaza emcimbini wokuhlonipha indlovukazi yomculo kamaskandi engasekho, uBusi Mhlongo eBat Centre eThekwini nasePlayhouse Opera Theatre. Ngo-2020 uBongiwe ukhiphe imicu emibili, obuthi Never Give Up nothi Ndimufumakandzi (I Am A Woman), okuyizingoma ebezihlanganisa ingxube ye-Afro jazz nesigqi sikamaskandi. Lo mculi uzalelwe esigcemeni sakwaK, KwaMashu maqede wafunda  eThandimfundo Primary, eTholamandla Secondary, eZakhe High, Intshisekelo naseReservoir Hills High.

Uqale ukucula eneminyaka eyisishiyagalolunye kusontosikole e-UCCSA ngaphambi kokudlulela emakhwayeni asezikoleni  wake wacula nasemakhwayeni omphakathi njengeKwamashu Community, Thokozani Choral nakwiPlayhouse Choral.

"Ngisekhona ePlayhouse kwiHandel's Messiah nasemicimbini yokugubha uKhisimusi. Ngiphinde ngibe wuthisha eHlengimpilo Full Service  eNanda eSkebheni langidlulisela khona ulwazi lwami lomculo khona ezinganeni okusiza uma isikole sinemicimbi nokuthuthukisa amakhono azo." 

Imali yokungena kwiTwosday with Bongiwe Ms Classic Msomi wu-R120 kuwonkewonke, uR90 kwizaguga ezihola impesheni bese kuba uR60 kwizitshudeni. 

t