Lukhula ngamandla udumo lukaThandeka kuMaskandi #Imbokodo #Intandokazi

UMCULI wesifazane onezingoma ezishisa izikhotha kulezi zinsuku kwiYouTube nakuSpotify, uThandeka Hadebe, ukhuze ibuya ngesivuthevuthe se-albhamu esihloko sithi Indawo Yenyembezi. Kule-albhamu ephume ngoLwesihlanu, uThandeka (32)) waseHlokozi eHighflats, usebenze neNkosi Yamagcokama engomeni ethi Bavele Bangithatha noLindani Gumede engomeni ethi Impilo Iyazenzela.

"Uma bekuphathe kabi,  ikhona eyakho ingoma  ewu-nombolo 2 . Uma uzazi ukuthi uyingqongqo, ukulindile unombolo 3. Uma usothandweni eyokugcina eyakho. Ukhetha oyithandayo. EzikaBhombela  yizo engivule ngazo."

Kwenzeka lokhu nje i-albhamu kaThandeka yangonyaka ofile esihloko sithi Wang'shela Wazi igila izimanga kwiYouTube nakwiSpotify. KwiYouTube le ngoma eyisihloko saleli cwecwe seyidlalwe amahlandla angaphezu kuka-2.1 million, ethi Musa Uku-confessor seyino-1 million, iWozani seyino-4 million kanti ethi Kuyangihlula Ukugana seyino-1.2 million. KwiSpotify iWozani ino-3.1 million streams, iWang'shela Wazi seyino-1.3 million bese iMusa Uku-confessor seyiku-1.3 million. UThandeka uthe ubonga kakhulu abantu bakuleli ngokumqophisa umlando wokuba ngumculi wokuqala wesifazane ukufinyelela kuleli zinga njengoba ama-million asewenzile engaphezu kuka-14.

"Zingane zakwethu ngiswele wona amazwi okubonga angalingana nendlela enginibonga ngayo. Eningenzele khona kukhulu kakhulu, iqiniso enilenze kimi njengomuntu wesifazane endimeni, angazi ngingabonga ngithini. Umlando niwuqophe ngami bafowethu,  bukani eningenzele khona lapha babhemu. U-14 million umlando lo eniwenze kule-albhamu."

UThandeka ngomunye wabaculi abaqale benandisa emigwaqweni yaseThekwini  futhi umculo wabo ungadlalwa emisakazweni njengoba esedlisela ozakwabo besifazane nabesilisa ngokudayisa. Nakuba kunjalo akalilahlanga ithemba njengoba agcina eseqokwa  eminxeni emibili kuma-Independent National Gospel Music Awards (Ingoma) ngo-2021.

Wayeqokwe  emunxeni weBest Gospel Maskandi nakoweBest Promotion nge-albhamu yakhe eyayithi Anginavalo (Inkom' Ingazal'Umuntu). Wayeqala ngqa ukuqokwa emqhudelwaneni wezindondo selokhu afika  emculweni ngo-2009.

"Kade ngangizama kodwa kungalungi. Ngiqale emculweni ngiphelezela abanye abaculi ngephimbo. Ngo2015 ngabe sengenza eyami i-albhamu ethi Bayeke Bahleke. Ngo-2019 ngibe sengilandelisa ngethi Anginavalo."  Ubuye wakhipha i-albhamu ethi  Tshelan' Abantu.

UThandeka uyingane yesibili ebantwaneni abane bakaNkk Bonangani uMaXulu noMnuz Thulebona Hadebe. Uphothule u-matric eMkhumbi High ngo-2012 ngaphambi kokufundela ubuntatheli eDurban University of Technology (DUT).