Kubungazwa abesifazane abavelele kwezobuciko ngale mpelasonto
LACONCO
Image: FACEBOOK
INYANGA yokubungazwa kwabantu besifazane iqale ngezinga elicokeme njengoba namuhla kuzobe kuchonywa uphephe legwalagwala amaciko esifazane avelele kumaBasadi In Music Awards eJoburg Theatre, eBraamfontein.
Lo mqhudelwano wezindondo uqale izolo lapho bekuklonyeliswa khona labo abenza eminye imisebenzi njengokumenenja, ukuphaqula,ukucwala nokunye. Emcimbini wanamhlanje kuzobe kunandisa uRorisang Sechele, Zee Nxumalo, Nomakhosini, Nokwazi, Mapula Monyepao, Azana noNtokozo Mbambo.
ULerato Kganyago, osakaza noProverb uhlelo lwaphakarhi nezinsuku ngo-12 iMidday Link Up kwiMetro FM, uzobe ethula abaqokiwe nabazokwethula izindondo. Lentokazi izobe isizana noLethabo Lejoy noRefilwe Modiselle abazobe benkanise kukhaphethi obomvu.
Ngaphambi kokuqala komcimbi omkhulu, izithameli zizozitika kukhaphethi oluhlaza njengotshani ngomculo ozobe uqhululwa woLee-Soulae, Kwazi M, Ma Nala, Natasha MD noDJ Swazi. Kwabaqokiwe kulo nyaka kubalwa uZee Nxumalo, Xolly Mncwango, Kamo Mphela, Makhadzi, Nontokozo Mkhize, Lwah Ndlunkulu, Bassie, Sneizy, Gigi Lamayne, Nadia Nakai, Babalwa M, Zethe, Naledi Aphiwe, Azana, Shandesh,Kharishma, Cici, Liema Pantsi, Relebogile Mabotja, Lootluv, Mpumi Mlambo,Moozle, Anele Zondo,Laconco nabanye. URebecca Malope uzohlonishwa ngendondo yeLifetime Achievement.
Umsunguli walo mqhudelwano futhi oyinhloko yawo, uHloni Modise, uthe kulo nyaka bahlose ukubungaza wonke umuntu wesifazane ovelele endimeni yomculo. Uthe lo mcimbi uwukudlulisa umyalezo kwabesifazane abayibambile insimbi ishisa ukuba bengabe besayeka.
Oyinhloko yaseJoburg Theatre, uXoli Ndimeni, uthe bayaziqhenya kakhulu ngokuba yingxenye yale ngqophamlando. Isiqubulo sakulo nyaka samaBasadi In Music Awards sithi Umhlaba, Amanzi, Umlilo noMoya.
LERATO KGANYAGO
Image: FACEBOOK
XOLLY MNCWANGO
Image: FACEBOOK
NTOKOZO MBAMBO
Image: FACEBOOK
REBECCA MALOPE
Image: FACEBOOK
LWAH NDLUNKULU
Image: FACEBOOK
AZANA
Image: FACEBOOK
UMAKHADZI
Image: SIGCINIWE