Kuboshelwe izingwazi emcimbini womculi wekwaito

INKAKHA yomculo wekwaito, uSbusiso "Sbu Malawyer" Ntshangase, izogubha ukuqeda iminyaka ewu-25 isicula ngokuzimela e-Eyethu Lifestyle Centre eSoweto namuhla.

USbu Malawyer (53) uzoshiyelana inkundla nezingwazi zakuleli okubalwa kuzo uJoe Nina, Thebe, Spikiri, Jakarumba, Mgarimbe, Gwyza, DJ Sbu, DJ Cleo, Alaska, Pitch Black Afro, Rethabile, Nokwazi, DJ Ganyani, Ma E, Duncan, Maggz, Ba2cada, DJ Fisha Fasha, Beast RSA, DJ Finzo, La Sauce no-Uncle Charlie. Uthe lo mcimbi uwenze ngenxa yokufakwa ugqozi yi-albhamu ayikhiphe ngo-2023, ebophele amaciko asemnkantshubomvu nasafufusa.

"Okungenza ngenze lo mcimbi yingoba, ngisho i-albhamu seyize yaqokwa kumaSama Awards ngo-2024, ngiyabona ukuthi kukhona okusafanele kwenziwe ngayo."

Lo mculi waqala ukuzibandakanya nezokungcebeleka ngesikhathi elingisa emdlalweni kaGibson Kente osihloko sithi What A Shame. Ngokuhamba kwesikhathi uSbu Malawyer wabe esethulwa kuChicco Twala wuLindelani Mkhize weJoyous Celebration.Ngo-1994 nango-1995 wabe esesebenza noMdu Masilela engomeni ethi Tsikitsiki nakwethi Y U 4 Me ngaphambi kokusungula iqembu iMashamplan ngokubambisana nomufi uTokollo Tshabalala.Ngo-1997 uSbu Malawyer wabe esekhipha eyakhe yokuqala esehamba yedwa esihloko sithi Amalawyer. Wabuya ngonyaka olandelayo esehambisana neTKZee nelinye icwecwe elashisa izikhotha elisihloko sithi Mzala.

Le-albhamu yenza kahle kakhulu njengoba yadayisa amakhophi awu-45 000. Ngo-1999 uSbu wahlanganyela noTokollo, Zwai Bala, Kabelo Mabalane, Loyiso Bala, Gwyza noDr Mageu basungula iTKZee Family.

Ngo-2000 uSbu Malawyer wakhuza ibuya ne-albhamu yesithathu eyayisihloko sithi Inja Yangasese, esepike umculi we-jazz ongasekho uGloria Bosman. Yize uSbu Malawyer azalelwa eSoweto kodwa u-matric wawuphothula esikoleni saseThekwini ngaphambi kokuyokwenza izifundo ze-Electronic Engineering eJohannesburg Technical College. Amathikithi okuthamela lo mcimbi asatholakala kumaComputicket, Shoprite naseCheckers.