Usethubeni lokukhuza ibuya owaxoshwa kwesobumeya KwaDukuza

LINGASE lithathe osemnyango limbeke emsamo uma sekuqokwa ubuholi obusha bukaMasipala waKwaDukuza njengoba owaxoshwa kwesobumeya kulo mkhandlu, uNksz Lindile Nhaca, esethubeni lokukhuza ibuya. 

Igama likaNksz Nhaca livela ohlwini lwamagama amathathu i-ANC ezoqoka kuwona ozoba yimeya yomkhandlu. 

Ubuholi obusha bomkhandlu buzoqokwa emhlanganweni ozoba ngoLwesine.

Isikhala sobumeya kuMasipala waKwaDukuza sivuleke emva kokuxoshwa kwemeya, uMnuz Ali Ngidi.

UNgidi wangena kulesi sikhundla ngonyaka odlule kulandela ukukhonjwa indlela kukaNksz Nhaca.

UNgidi, nephini lemeya, uMnuz Njabulo Cele, bayalelwa ukuba basule ezikhundleni ngasekuqaleni kwale nyanga.

UNgidi noCele badilizwa ezikhundleni emva kombiko wokuthi umasipala wasebenzisa imali eshisiwe ubaqashela izimoto ekubeni umhlangano womkhandlu ungakaze ugunyaze ukuthi baqashelwe izimoto.

Kwakuphinde kube nombiko oveza ukuthi umasipala ubukhokha u-R170 000 njalo ngenyanga wokuba kugadwe uNgidi nomuzi wakhe.

Uhlu lwamagama okuzokhethwa kuwona luqinisekiswe wumgqugquzeli wethimba lesikhashana elihola i-ANC esifundeni iGeneral Gizenga Mpanza, uMnuz Nkosenhle Mngadi.

Ekhuluma ne-IOL uMngadi uthe babe nomhlangano wekomiti elibhekelele ukusebenza kwansuku zonke kwi-ANC esifundeni, lapho beqoke khona amagama amathathu okuzokhethwa kuwo.

"La magama athunyelwe ebuholini be-ANC esifundazweni, okuyibo obuzothatha isinqumo sokugcina."

Okhulumela i-ANC KwaZulu-Natal, uMnuz Fanle Sibisi, akazange ayiphendule imibuzo ayithunyelwe.

Ubuholi be-ANC esifundeni iGeneral Gizenga Mpanza buphakamise igama likaNksz Nhaca, elikasomlomo, uNkk Dolly Govender, nelalowo owayeyimeya kaMasipala wesifunda Ilembe, uMnuz Siduduzo Gumede, ukuba kukhethwe kuwo ozoba yimeya.

Amaqembu aphikisayo athe ukungaqokwa ngokushesha kwemeya kwenza ukuthi izinto zibe mapeketwane emkhandlwini.

I-DA ne-ActionSA bakhale ngokuthi ayisahlali imihlangano yekomiti elibhekelele ukusebenza kwemali emkhandlwini.

UNgidi uyena obengusihlalo wekomiti ngesikhathi ephethe isikhundla sobumeya.

Womabili la maqembu acele uMphathiswa wokuBusa ngokuBambisana neziNdaba zoMdabu, uMfu Thulasizwe Buthelezi, ukuba angenelele.

Ohola iDA emkhandlwini, uNksz Privi Makhan, uthe imihlangano yekomiti neyesigungu esiphezulu ihlezi ihoxiswa ngaphandle kwencazelo.

"Lokhu kuphazamisa ukusebenza komkhandlu. Sinxusa uButhelezi ukuba angenelele ngokushesha."

Ikhansela le-ActionSA, uMnuz Halalisani Ndlovu, lithe umhlangano wokugcina wekomiti wawungasekuqaleni kukaJuni.

"Umhlangano olandelayo kuhlelwe ukuthi ube ngo-Agasti 20. Lokhu kusho ukuthi kuzophela izinyanga ezine ikomiti lingakaze lihlangane."