Izindaba

UKabza De Small usigeze ubebebe: umndeni kaLuthuli

Charles Khuzwayo|Published

Kabza De Small

Image: FACEBOOK

ISIHLOKO: Ubab' Motha

UMCULI: Kabza De Small

UHLOBO: Amapiano

UMHLAZIYI: CHARLES KHUZWAYO

YAGCINA iphumile i-albhamu yenkosi yomculo wamapiano uKabelo "Kabza De Small" Motha esihloko sithi Bab' Motha. Leli cwecwe belibhekwe ngamehlo abomvu ngabathandi bomculo wokujuxuza. Ngingasho ngingananazi ukuthi kuye ngamagama enkehli. Ngibheme ngakholwa ngenhla yamanoni aqukethwe kule-albhamu.

Ngiqale ngachazwa ukubona ukuthi ibophele abaculi engibahloniphayo okubalwa kubo Nkosazana Daughter, Sykes, Young Stunna, Mnqobi Yazo, Da Musical Chef, Nontojozo Mkhize, Mthunzi, Njelic, Zawadi Yamangu, Kelvin Momo, Marumba Pitch, Mawhoo, Zee Nxumalo, Dlala Thukzin, DJ Maphorisa, Simmy, GL_CeeJay, MDU akaTRP,SOA Mattrix,  Nobuhle nabanye. Lamagama ewodwa akwenza ukulangazelele ukuyilalela yonke le-albhamu equkethe amanoni awu-16.

Yize kungumculo wokujuxuza kodwa engikuphawulile ukuthi izingoma eziningi zinomyalezo, ubufakazi balokho ngethi Incwadi Yenduduzo. UKabza De Small uvula leli cwecwe ngengoma  ngeyenziwe kabusha ethi Kabza Chant 2.0. Engikuqaphelile ngale ngoma ukuthi isigqi sayo nezinhlamvu akusafani. Amabhinca engayithakasela ngenxa yezibongo namatemu adume emabhinceni njengo”Khuphuka Small!."

Ingoma ethi Ngiyozama, uyinonge kamnandi umfana waseLamontville uThukzin. Uma ungumzalwane uzoyithakasela eculwa yintokazi yaseNanda, uNontokozo nensizwa yaseHammarsdale, uMthunzi esihloko sithi Siyabonga.

Ezinye izingoma ezingichazile ngezithi Eningi Remix, Iphupho, Amandla, Uma Kujabule Wena, Amakhosi, Incwadi Yenduduzo, Ukuthula, Izimbali, Imali Yami, Isthombe nezinye.

Nakuba kunjalo, kodwa baqinisile abathi alikho isoka elingenasici. Kungijabulisile ukuzwa izinhlamvu zengoma yomculi kamaskandi, uBhekumuzi Luthuli, ethi Abalozi kodwa amathe abuyele kasifuba uma sengithola ukuthi kuthiwa lengoma ibhalwe wuLindokuhle Mnqobi Msimango kuphela ekubeni uSykes ecula izinhlamvu zikamfokaMolo njengoba zinjalo. Ngiyacela uKabza enze ubulungiswa emndenini kaBhekumuzi njengoba engasekho emhlabeni.

Nakuba kunjalo kodwa yona le-albhamu imnandi yonke. Akudingeki ukuthi uze ube ngumthandi womculo wamapiano ukuze uyithakasele, nabadala bazoyijabulela impela. Nawe Mpumalanga Province awumncinyane!