Abaphathiswa bavuma izinkampani ezisolwa enkohlakalweni

ABAPHATHISWA baKwaZulu-Natal abasolwa enkohlakalweni, uMnuz Sipho Hlomuka noNksz Nomagugu Simelane, bavume ukwazi izinkampani okusolwa ukuthi zahlomula ngendlela engaqondakali kuhulumeni waKwaZulu-Natal.

UHlomuka, ophathiswe uMnyango wezeMfundo, uvume ukwazi inkampani okuthiwa isohlwini lwezinkampani ezisethubeni lokuhlomula ohlelweni lwezigidi zamarandi lokuphakela izikole esifundazweni, i-Aphigugu Trading.

UHlomuka uvumile ukuthi le nkampani yasungulwa nguyena ngo-2015, ngaphambi kokuthi abe nesikhundla kuhulumeni.

"Ngasula emva kokuba senginesikhundla kuhulumeni. Angazi-ke ukuthi kwenzekani ngenkampani emva kwalokho."

Imininingwane yokubhaliswa kwenkampani ikhombisa ukuthi iphethwe wumuntu onesibongo esifanayo nesikaHlomuka, kunezinsolo zokuthi lo muntu uyilungu lomndeni.

UHlomuka uthe akazi ukuthi le nkampani isethubeni lokuhlomula ohlelweni lokuphakelwa kwezikole.

UNksz Simelane, ophathiswe uMnyango wezeMpilo, yena uvume ukwazi inkampani athe eyomndeni wakhe, iKwazi-Gugu Investments.

Le nkampani kuthiwa yaboleka imali ebhange elikhungethwe yizinkinga, Ithala, yaphinde yathola uxhaso luka-R1.3 million eMnyangweni wezoLimo KwaZulu-Natal.

UNksz Simelane uthe le nkampani yasungulwa abazali bakhe ngo-1996, wathi washiya kuyona ngo-2004.

Uthe akazange abe nesandla ekutheni iKwazi-Gugu Enterprise ithole uxhaso lukahulumeni.

Uthe uzobhala umbiko azowuthumelela uNdunankulu waKwaZulu-Natal, uMnuz Thami Ntuli, nobuholi be-ANC, mayelana nalolu daba.

"Ngisacabanga nokuthatha izinyathelo zomthetho njengoba kube khona nokuhuduleka phansi kwegama lami."

Liyakhula ikhwelo lokuba uHlomuka noNksz Simelane behle ezikhundleni.

UNksz Simelane uphinde asolwe nangokuba nesandla ekuxoshweni komsakazi weVuma FM, uJacinta Ngobese-Zuma, nokuyizinsolo aziphikayo.

I-ANC KwaZulu-Natal ikhale ngokuthi kunomkhankaso wokungcolisa amagama abaholi bayo.

Umgqugquzeli we-ANC KwaZulu-Natal, uMnuz Mike Mabuyakhulu, uthe udaba lokuqokwa kwezinkampani ezizophakela izikole alukaphothulwa.

UMabuyakhulu uthe njengamanje kuvulwe ithuba lalabo abanezikhalo ukuba beze phambili.

Odabeni lukaNksz Simelane, uMabuyakhulu uthe bajabule ukuthi iVuma FM iziphikile izinsolo zokuthi uNksz Simelane waba nesandla ekuxoshweni kukaNgobese-Zuma.

Isitatimende se-ANC sicasule uNgobese-Zuma osabise ngokuthatha izinyathelo zomthetho njengoba ekhala ngokuthi siyadukisa, nokuthi singcolisa igama lakhe.

UMabuyakhulu uphinde wamemezela ukuthi sebejube uphenyo mayelana nekhansela le-ANC kuMasipala waseMandeni, uNksz Lungile Mthembu, elisolwa ngokufuna ukugwazelwa wusonkontileka owathola ithenda yokulungisa umgwaqo.

Engxoxweni eqoshiwe esabalale ezinkundleni zokuxhumana, kuzwakala umuntu okusolwa ukuthi wuNksz Mthembu efuna ukugwazelwa ngo-R100 000.

Umhlaziyi wezepolitiki ozinze eNyuvesi yaKwaZulu-Natal, uMnuz Zakhele Ndlovu, uthe kuyinto eyejwayelekile ukuthi amathenda anikezwe izihlobo zabantu abaphethe izikhundla kwipolitiki.

UNdlovu uthe abantu abafaka izicelo zamathenda basuke bephelezela izinkampani eziphethwe yizihlobo zabanezikhundla kwipolitiki.

"Ongqongqoshe balanda izihlobo, bazisungulise amabhizinisi. La mabhizinisi yiwona athola amathenda. Laba bantu badla nezihlobo zabo. Uma kukhangiswa amathenda kusuke kudlalwa ngabantu. Le nto ifana nokuthi sibizelwe kwinhlolokhono sibe baningi ekubeni besuke sebaziwa abantu abazoqashwa. Thina abanye sisuke simosha isikhathi sethu."

UNdlovu uthe uhulumeni kufanele ayiqede indaba yamathenda.

"Inobugebengu obukhulu le nto. Ekugcineni uma sekukhona abantu ababika ngale nkohlakalo bese beyabulawa."