KUKHONA nowayengungqongqoshe ohlwini lwabantu okuthiwa amacala abo ahoxiswa ngendlela engaqondakali wuMqondisi wezokuShushisa esifundeni iGauteng South, u-Advocate Andrew Chauke, omiswe wuMengameli Cyril Ramaphosa.
Kuvela igama lowayengungqongqoshe wezeMidlalo, uMnuz Zizi Kodwa, ohlwini lwamacala ahoxiswa uChauke ngendlela engaqondakali.
UChauke umiswe ngoMsombuluko, kuzoqala uphenyo lokuthi ukulungele yini ukuba sesikhundleni.
Okhulumela iHhovisi likaMengameli, uMnuz Vincent Magwenya, uthe uRamaphosa ubone kungcono ukuba amise uChauke ngenxa yobucayi bezinsolo abhekene nazo.
"URamaphosa uqale wanikeza uChauke ithuba lokuthi achaze ukuthi kungani kungafanele amiswe emsebenzini. Ekugcineni uRamaphosa unqume ukuba amise uChauke njengoba kuzoqala uphenyo."
Kuvela ukuthi sekunesikhathi eside kunezikhalo ngoChauke.
Umqondisi wezokuShushiswa koMphakathi kuzwelonke, u-Advocate Shamila Batohi, wabhalela uRamaphosa eminyakeni emibili eyedlule, emcela ukuba amise uChauke.
Kunezinsolo zokuthi kunokuhudula izinyawo ekushushiseni amacala kwikhomishini eyayiphenya izinsolo zokuLawulwa koMbuso yiDlanzana afakwe ezinkantolo ezingaphansi kwesifunda asiphethe.
Ngonyaka odlule uChauke wathatha isinqumo sokuhoxisa icala lenkohlakalo kanye nokukhwabanisa elalibhekene noKodwa kanye nabanye asolwa nabo.
Icala lahoxiswa emva kwezethulo zabameli bakaKodwa.
U-Advocate Batohi waphumela obala, wathi bazosibuyekeza isinqumo sokuhoxiswa kwala macala.
Ngo-2014 uChauke wanquma ukuhoxisa icala lokubulala, nelokuthumba elalibhekene nowayengumphathi wezinhloli, uMnuz Richard Mdluli.
Isinqumo sikaChauke sachithwa yiNkantolo yamaCala aDlulisiwe, uMdluli wagcina egwetshwa iminyaka emihlanu.
Amaqembu ezepolitiki akwamukelile ukumiswa kukaChauke. Umholi we-ActionSA ePhalamende, uMnuz Athol Trollip, uthe kade babesho ukuthi uChauke akamiswe esikhundleni.
"Asazi ukuthi yini lena eyenze ukuthi uRamaphosa athathe isikhathi eside kangaka ukumisa uChauke. Nakuba sikujabulela ukuthi useze wamiswa ekugcineni, kodwa siyafuna ukwazi ukuthi bekubambephi. Njengoba esemisiwe nje sifuna kuqalwe uphenyo ngokushesha. Sifuna zonke izinsolo abhekene nazo ziphenywe."
Okhulumela iDA kwezobulungiswa, u-Advocate Glynnis Breytenbach, uthe baningi abantu abakhohlakele abavikelwe wuChauke.
"Maningi amacala ahudule izinyawo kuwona. UChauke akafanelwe wukuhlala kulesi sikhundla. Abantu abasazithembi ezobulungiswa ngenxa nje yabantu abambalwa abakhohlakele abasezinhlakeni zobulungiswa. Manje sekuyikhathi sokuthi senze izinto ezizobuyisa isithunzi sezobulungiswa."