INgonyama Trust isola uNgwenya ngokunqwaha no-R41 million

IBHODI leNgonyama Trust lisola owayengusihlalo walo, iJaji Jerome Ngwenya, ngokunqwaha no-R41 million walesi sikhwama.

Amalungu ebhodi athi asehluleke ancama ukuthola le zigidi zamarandi ezabolekwa wuhlaka olungaphansi kweNgonyama Trust, iNgonyama Holdings, ngesikhathi uNgwenya esengusihlalo webhodi.

UNgwenya ungomunye wabaqondisi beNgonyama Holdings, ibhodi lithe selizame kaningi ukususa uNgwenya ohlwini lwabaqondisi beNgonyama Holdings.

Isikhulu esiphezulu esibambile kwiNgonyama Trust, uMnuz Siyamdumisa Vilakazi, sithe sebethathele uNgwenya izinyathelo zomthetho.

UVilakazi uthe iNgonyama Holdings yabhaliswa ngokusemthethweni ngo-2019.

Uthe uNgwenya, nomunye owayeyisikhulu esiphezulu kwiNgonyama Trust ngaleso sikhathi, baba abaqondisi beNgonyama Trust.

UVilakazi uthe ngo-2021 iNgonyama Holdings yaboleka izigidi zamarandi kwiNgonyama Trust.

Ngalesi sikhathi uNgwenya wayengusihlalo webhodi leNgonyama Trust aphinde abe wumqondisi kwiNgonyama Holdings.

UVilakazi uthe uNgwenya uyanqaba ukuchaza ukuthi yashonaphi le mali.

"Le mali yakhokhwa izigaba ezintathu. Kwaqalwa ngo-R10 million ngoMashi (2021), kwalandela omunye u-R10 million ngoJulayi, kwase kuba u-R21 million ngoNovemba. Kusukela lapho iNgonyama Holdings ayikaze ilethe umbiko wokusebenza kwemali. UMcwaningi-mabhuku omkhulu uhlezi ebuza ukuthi le mali ibuya nini uma ecwaninga amabhuku eNgonyama Trust."

UVilakazi uthe sebefake izicelo ezimbili enhlanganweni ebhalisa amabhizinisi iCIPC, bezama ukususa uNgwenya njengomqondisi weNgonyama Holdings.

UVilakazi uthe lezi zicelo azizange ziphumelele emva kokuba abameli bakaNgwenya beziphikisile.

"Namhlanje sithi siyaziqhelelanisa neNgonyama Holdings. Sifisa abantu bazi ukuthi iNgonyama Trust isiqhwagwe abantu abathile. Yingakho sesinqume ukuthatha izinyathelo zomthetho."

UVilakazi uthe bathatha izinyathelo zomthetho ezehlukene.

"Angikwazi ukuphawula kakhulu ngalezi zindaba njengoba kusaqhubeka uphenyo. Kukhona izinsolo zokukhwabanisa eziphenywa woKlebe."

Kuthintwa uNgwenya, uvele wabhoka ngolaka.

UNgwenya ubuze ukuthi kungani ibhodi lihluleka wukumphuca iNgonyama Holdings uma kuwukuthi ngempela le nkampani ingaphansi kweNgonyama Trust.

UNgwenya uphonsele inselelo intatheli ukuba ilethe imininingwane yokubhaliswa kweNgonyama Holdings, eyemizamo yokumkhipha njengomqondisi weNgonyama Holdings, kanye neyezinyathelo zomthetho athathelwe zona ngaphambi kokuthi aphendule ngalolu daba.

Iphini likasihlalo webhodi leNgonyama Trust, u-Advocate Linda Zama, lithe kwaba yiphutha kwasekuqaleni ukuthi uNgwenya abe wusihlalo webhodi aphinde abe wumqondisi weNgonyama Holdings ngesikhathi esisodwa.

U-Advocate Zama, owayeyilungu lebhodi ngesikhathi iNgonyama Holdings itshelekwa u-R21 million, uthe waphikisana nalesi sinqumo.

"Nokho langidla ivoti, ngabe senginquma ukusula ngoba ngangingahambisani nalesinqumo."