IMK nethemba lokwesekwa esiphakamisweni sokungamethembi uRamaphosa

I-MK ibeke amathemba ayo ekwesekweni nangamaqembu ayingxenye kahulumeni wokubambisana esiphakamisweni sayo sokungabethembi ubuholi bukaMengameli Cyril Ramaphosa.

I-MK ithe iyazi ukuthi ngisho namaqembu ayingxenye kahulumeni wokubambisana awanelisekile ngobuholi bukaRamaphosa, yanxusa ukuba onke la maqembu eseke isiphakamiso sokuba kuxoshwe uRamaphosa.

USotswebhu weMK, uNksz Colleen Makhubele, umemezele ukuthi sebefake isiphakamiso sokungabethembi ubuholi bukaRamaphosa.

Lesi siphakamiso sizolalelwa ePhalamende ngosuku olungakanqunywa.

Ukuze isiphakamiso seMK siphumelele kungadingeka ukuthi sivotelwe nangamaqembu ayingxenye kahulumeni wokubambisana.

UNksz Makhubele ubalule iDA njengelinye lamaqembu akuhulumeni wokubambisana anganelisekile.

UNksz Makhubele uthe iDA imdinelwe uRamaphosa ngenxa yokungaxoshwa kongqongqoshe abalandelwa yifu elimnyama.

"I-DA ihlezi incikiselela uRamaphosa, ithi akaxoshe ongqongqoshe abasolwa enkohlakalweni. Kuze kube manje labongqongqoshe abakaxoshwa. Kuxoshwe nje ungqongqoshe oyedwa. Lokhu kukhombisa ngokusobala ukuthi uRamaphosa akazimisele nokulwa nenkohlakalo. Nginethemba lokuthi wonke amaqembu azokhombisa ukunganeliseki kwawo ngokuthi eseke isiphakamiso sokuthi kukhishwe uRamaphosa. Amaqembu ahlezi ethi wona abeka phambili izidingo zabantu. Lesi yisikhathi sokuthi wonke amaqembu abeke phambili izidingo zabantu."

Nokho umholi weDA, uMnuz John Steenhuisen, uthe ngeke bayeseke imizamo yeMK yokukhipha uRamaphosa.

USteenhuisen uthe abazinaki izinto ezishiwo yiMK ngenxa yokuthi umholi wayo, uMnuz Jacob Zuma, wehluleka wukuphatha ngesikhathi enikezwe ithuba.

"Wadala umonakalo omkhulu ngesikhathi ephethe iminyaka eyisishiyagalolunye. Namanje sizama ukulungisa lowo monakalo."

UNksz Makhubele uthe abantu bakuleli abasamfuni uRamaphosa.

"Senyukile kakhulu isibalo sabantu abangasebenzi. Abantu babulawa yindlala futhi abasamfuni uRamaphosa. Le nto esiyishoyo ifakazelwa yinqwaba yemibhikisho ekhona ezweni. Imibhikisho ikhombisa ukuthi abantu bamcasukele uRamaphosa. Angazi ukuthi usahleleleni esikhundleni."

UNksz Makhubele uthe uRamaphosa uyehluleka wukuqondisa ongqongqoshe abaphethe.

Uthe ukungaxoshwa kukaNgqongqoshe wamaPhoyisa, uMnuz Senzo Mchunu, kukhombisa ngokusobala ukuthi uRamaphosa uyesaba ukubathathela izinyathelo ongqongqoshe abalandelwa yifu elimnyama.

"Banqume ukuxosha uNgqongoshe weMfundo ePhakeme (uDkt Nobuhle Nkabane) ngoba nakhu kwehlela ngakuye. Bayekelwani bonke laba abanye ongqongqoshe abalandelwa yiphunga lenkohlakalo?

"Ngalena kwamahlazo enziwa ongqongqoshe abaphethe, naye uphinde abe notwayi lwakhe njengoba kunodaba lwasePhala phala olungakaqedwa. Kusobala ukuthi uRamaphosa uyabavikela abantu abasolwa enkohlakalweni ukuze bamvikele naye."