Umndeni ugonyuluke ngokushona kukaMadluphuthu

UMNDENI womlingisi wodumo lukaMadluphuthu, uVuyo Oscar Mgudlwa, ugonyuluke ngembangela yokushona kwalesi silomo. Izindaba zokudlula kwaleli ciko, elibuye lazakhela udumo engomeni kaSpikiri esihloko sithi Ngeke Balunge, zidalulwe yindodana yalo, u-Asanda Mgudlwa. "Uphumule ngokuthula baba. Ngiyakuthanda futhi ngiyohlale ngikuthanda, Madiba Dlomo," kubhala u-Asanda kwiFacebook.

Umfowabo kamufi, uSipho Mgudlwa, ucashunwe emithonjeni yezindaba ethi uMadluphuthu ushonele esibhedlela iRosettenville, eGoli, ngoLwesithathu ekuseni, emuva kokugula isikhashana. USipho uthe uMadluphuthu ungeniswe esibhedlela emuva kokukhala ngenkinga yokuphefumula ngeSonto.

Phakathi kwamaciko athumele umyalezo wenduduzo ngokudlula emhlabeni kukaMadluphuthu kubalwa uZola Hashatsi kaMotsiri othe ugqemeke udume lwengozi ngozakwabo ngoba ubewumngani futhi engumfowabo. UZola ubonge uMadluphuthu ngendima ayiklame emkhakheni wezokungcebeleka. "Ulale ngokuthula mfowethu, sibe nesikhathi esimnandi. Sengathi umndeni wakho, abangani nemboni kungaphola," kuphetha uZola.

Umlingisi futhi ongumdidiyeli wamafilimu, uMandla N Ngcongwane, uthe ulahlekelwe umkhakha wezokulungisa ngoMadluphuthu ngoba ubengeyena kuphela usaziwayo kodwa ubengumthokozisi wabantu kunoma yikuphi lapho abehamba khona.

"Ubenekhono elingandile lokuthokozisa abantu ngisho nangesikhathi ezinzima kanjani," kusho uMandla N osebenze noMadluphuthu emidlalweni yakhe yethelevishini ekhonjiswa kwi-e.tv, Isitha neBlackdoor. UMandla N uthe ulahlekelwe wumuntu obengaphezu komngani.

"Ngilahlekelwe nguzakwethu wangempela kwezobuciko. Ubewumuntu ebengithembela kuye uma kuziwa ekubhaleni, ukubonisana ngamaqhinga. Besiphezu kokuqala omunye umsebenzi omkhulu. Ushiye umgodi ongeke wagqitshwa ngumuntu," kuphetha uMandla N.

Umculi wekwaito kodwa oseyilungu lePhalamende, u-Eugene Mthethwa, uthe usebenze kakhulu noMadluphuthu emafilimini kaChicco Twala. Uthe uMadluphuthu ubenekhono lokukwazi ukwenza indawo ayilingisayo kube sengathi yimpilo ayiphilayo. Umchaze njengomuntu obezithobile yize abesedumile.

"Phezu kokuduma kwakhe kodwa ubengakaze wakhukhunyezwa wudumo. Ubehlonipha, ehlale ehleka nanoma wubani," kuphetha u-Eugene.

UMadluphuthu wadunyiswa kakhulu yile ndawo kangangoba waze wadla izidlo nomengameli bezwe futhi nabesifazane bechazeka uma bembona. Uzalelwe eDaveyton, e-East Rand eminyakeni ewu-50 eyedlule. Uyise wamshiya eseneminyaka ewu-13 okwenza wagcina esekhuliswa wunina naye ongasekho. Kumthathe iminyaka ewu-15 ezama ukungena endimeni yezokungcebeleka. Ngo-1998, wake wenza i-albhamu neMina Nawe esihloko sithi Man Child.

Abathandi bomculo wekwaito bazomkhumbula engomeni kaMapaputsi eyayithi Izinja Zakhona ngo-2001. Wazama ukukhipha ama-albhamu amabili kodwa abhacaza, okwamphoqa ukuba ayobamba itoho ePick n Pay. Kwaze kwaba ikhono lakhe libonwa nguChicco maqede uMadluphuthu wagqama esenguMadluphuthu efilimini eyayithi My Sh*t Father and My Lotto Ticket, elingisa nowayeyisiqongqwane se-Orlando Pirates, uSteven Mnguni, umculi uWinnie Khumalo, uNokwazi Dlamini noLucky Boy Mtshali owayedume ngelikaSdididi ngeminyaka yo-1980.

Kusukela lapho akabange esabheka emuva. Uqophe amafilimu amaningi njengoba aze adlala nekwethi Ukufa KukaMadluphuthu. Emculweni ugcine esepikwa wuSpikiri engomeni ethi Ngeke Balunge, ehambisana noBrickz, Skhokho, Brown Dash, Skhokho, Ntukza nomfowabo uMa-E bodumo kwiTeargas.

USipho uthe umufi ushiye emhlabeni abantwana abane, odadewabo abathathu nomfowabo. Kuze kwashaya isikhathi sokushicilela kungakaziwa ngezinhlelo zomngcwabo kamufi.