Indodana yeNdidane ijatshuliswa wukuhlonipha uMgqumeni

INDODANA yesihlabani somculo kamaskandi, uMtshengiseni "Indidane" Gwensa, ikuthakasele kakhulu ukuthola ingqayizivele yethuba lokuhlonipha umculi owayeyimbangi kayise, uMgqumeni "Ibhova LikaDikadika" Khumalo kwiDundee July: Mabhinca Experience eBattlefield Sports Resorts, eDundee, ngeSonto.

Isolezwe lithole ukuthi uSphesihle "Ithole LeNdidane" Gcwensa, uzohlabelela izingoma zikaMgqumeni nabanye ozakwabo abanjengoLusanda "Ibhova Elincane" Khumalo, uLimit Nala, uMdumazi Mhlongo noPotso Ngobese waMavikelambuso.

"Ngizizwa ngijabule kakhulu ukuthola ithuba elikhulu kangaka. Ukukhethwa kwami eningini kanje kunginika esinye isithombe ngokuqhubeka komsebenzi wami nomculo lo engiwubambile. Ngiyathembisa kakhulu ukuthi leli thuba ngizolisebenzisa njengokungikhetha ngokungithemba.  Kuyithuba elikhulu kakhulu kimina leli," kuphetha Ithole Lendidane osekuyilo eselingamele amaqembu kayise okubalwa kuwo, Amageza Amahle. 

 Umgqugquzeli walo mcimbi, uVezokuhle Nala, ucashunwe ethi inhlosongqangi ukuqeda isihlava sokungcofana kukaMgqumeni neNdidane ukuze kungabi nomthelela ezinganeni zabo. UNala ukugxeke kakhulu ukulwa kwabaculi ngoba ekusola ngokuqeda umsoco. 

Kwenzeka lokhu nje, umculi ozalwa uMtshengiseni, Indodakazi Yendidane nozalwa wuMgqumeni, Ibhovakazi, basanda kugadlana ezinkundleni zokuxhumana nangezingoma. UMgqumeni neNdidane baqala bengamathe nolimu besacula ndawonye emaqenjini kaMahawukela Mseleku, okwakuwumalume kaMgqumeni owabulawa ngokudutshulwa ngo-2000.

Emuva kokuxabana kukaMgqumeni nokanina, uMuhle Khuzwayo kubangwa ukuhola la maqembu, kwenza uMgqumeni noMtshengiseni basungula Amagcokama. Umbango wemali phakathi kwabo wenza yahlukana inhloko nesixhanti futhi bagcina sebeyinkukhu nempaka. UMgqumeni wasala kuMagcokama kwathi uMtshengiseni wasungula Amageza Amahle. Kwaqala kanjalo ukungcofana kwabo okwagcina kukhiphe izidumbu ezazingaphezu kuka-6. Ngo-2009, umsunguli wamaSatma Awards, uDumisani Goba, nowayengumphathi woKhozi FM, uWelcome Bhodloza Nzimande, baphoqeleka ukuwuvala umculo walezi zinsizwa. NgoDisemba walowo nyaka, zagcina zikhumelene umlotha kanti uMgqumeni uzodlula emhlabeni ngoDisemba 19. Ngenhla yezinsongo, uMtshengiseni akalubhadanga emngcwabeni kaMgqumeni.

Ngo-2015, uMtshengiseni wabe esedlula emhlabeni esibhedlela saseDundee. Ngaphandle kwalesi sigaba sokuhlonishwa kukaMgqumeni kulo mcimbi, abanye abaculi bakamaskandi abazobe benandisa ngoKhuzani, Igcokama Elisha, Gatsheni, Sminofu, uMafikizolo, Menzi, Navigator, Bahubhe, Mntuyenziwa, Mjolisi, Ntencane, Quality noLwah Ndlunkulu. Yize kungenwa mahhala uma ubhincile kodwa abazobe beziswenkele ngokwabo bazokhokha u-R200 esangweni.