Kubhekwe lukhulu kuRamaphosa ozokhuluma ngolukaMchunu
Umengameli uCyril Ramaphosa nongqongqoshe wamaphoyisa Senzo Mchunu
Image: Sigciniwe
WONKE amehlo azobe ethe njo kuMengameli Cyril Ramaphosa, ozokwenza isimemezelo ngodaba lwezinsolo ezishaqisayo ezibhekene noNgqongqoshe wamaPhoyisa, uMnuz Senzo Mchunu.
URamaphosa uzokwethula inkulumo ayibhekise ezweni ngeSonto, ngo-7 ebusuku.
Kule nkulumo kubhekwe ukuthi amemezele izinyathelo azozithatha kulandela izinsolo ezishaqisayo ezenziwe uKhomishana wamaPhoyisa KwaZulu-Natal, uLieutenant General Nhlanhla Mkhwanazi, zokuthi uMchunu usondelene nezigebengu eziphazamisa ukusebenza komthetho.
Okhulumela uRamaphosa, uMnuz Vincent Magwenya, uthe umengameli usekulungele ukwenza isimemezelo kulandela izingxoxo abe nazo nabantu abahlukene.
Kwenzeka lokhu nje, ziyaqhubeka nokumnetha uMchunu njengoba evulelwe amacala okudukisa iPhalamende waphinde wabikwa nasekomitini lezobuqotho.
Omathathu amaqembu alandela i-ANC ngobukhulu ePhalamende, i-DA, MK ne-EFF, athathele uMchunu izinyathelo. I-DA neMK bavulele uMchunu icala emaphoyiseni, kwathi i-EFF yona yaceba uMchunu ekomitini lezobuqotho ePhalamende.
La maqembu afuna ukuthi uMchunu ajeziselwe ukuthi waqamba amanga ePhalamende njengoba eseshaye ungqimphothwe, wavuma ukuthi uyamazi uMnuz Brown Mogotsi.
UMchunu wathi akamazi uMogotsi ngesikhathi ebuzwa ngaye ePhalamende ngoMashi.
NgoLwesithathu, uMchunu ubuye wakhipha isitatimende, wavuma ukuthi uyamazi uMogotsi kodwa wathi akasondelene naye.
IPhini likaSotswebhu we-DA ePhalamende, uMnuz Baxolile Nodada, lithe bafuna ukuthi uMchunu ajezele ukuqamba amanga lathi uzifake ogibeni olukhulu.
"Ngesikhathi esePhalamende ngoMashi, wathi akamazi uMogotsi. UMogotsi lona usondelene nezigebengu. Manje yena uMchunu useyajika, uthi uyamazi. Lokhu kusho ukuthi waqamba amanga ePhalamende."
UNodada uthe bazophinde babike uMchunu ekomitini lezobuqotho ePhalamende.
Okhulumela iMK, uMnuz Nhlamulo Ndhlela, uthe phezu kwecala lokudukisa, baphinde bavulela uMchunu icala lokuphazamisa ukusebenza kwengalo yomthetho.
Uthe baphinde bavulela icala nePhini likaKhomishana wamaPhoyisa, uLieutenant General Shadrack Sibiya.
UMkhwanazi wenza izinsolo zokuthi uSibiya uhlezi phezu kwamadokodo anemiyalelo yokuba kuboshwe abantu ababandakanyeka emacaleni okubulawa kosopolitiki esifundazweni.
USotswebhu we-EFF ePhalamende, uNksz Nontando Nolutshungu, uthe kusobala ukuthi uMchunu uqambe amanga ngakho ke kufanele kube nophenyo olunzulu.
UMchunu akasiyena umholi wokuqala ukubhekana necala lokudukisa.
OwayenguNgqongqoshe wezokuThuthukiswa koMphakathi, uNksz Bathabile Dlamini, walahlwa icala lokuqamba amanga efungile ngesikhathi ethula ubufakazi kwikhomishini eyayiphenya ngesiphithiphithi esacishe saholela ekutheni umnyango uhluleke ukuholela izibonelelo.
Wagetshwa iminyaka emine ebhadla ejele kodwa wagcina ekhokha inhlawulo ka-R200 000.
Owayengungqongqoshe weziMali, uMnuz Nhlanhla Nene, wasula esikhundleni emva kokuba kuvele ukuthi waqamba amanga, wathi akabazi abomndeni wakwaGupta.
Owayengusotswebhu we-ANC ePhalamende, uMnuz Tony Yengeni, wagwetshwa iminyaka emine ejele ngecala lokudukisa kanye nenkohlakalo. Wadedelwa ngoshwele emva kokudonsa izinyanga ezine.