Umlingisi wodumo ukhuza ibuya kwiScandal!

KULINDELEKE ukuba kushube kwiScandal! njengoba umlingisi uMakhaola Ndebele obenguReggie Pheko, uyise kaDintle Nyathi, ekhuza ibuya.

Ngokusho kwesitatimende esithunyelelwe abezindaba, indawo kaReggie izoqala ukubonakala kulo mdlalo ngoJulayi 17. Siqhuba isitatimende sithe okuzosusa umsindo wukuthi uzothola ukuthi indodakazi yakhe isesithenjini sikaNhloso Gasa.

Kwenzeka lokho nje uDintle uyamdinga uyise ukuba azobamba iqhaza ezingxoxweni zelobolo. UMakhoala uthe usekulangazelele kabi ukuveza elinye ikhono ngale ndawo yakhe.

Uthe ababukeli balo mdlalo abalindele ukuqhuma kwezinhlasi ngobudlelwano baReggie nendodakazi yakhe. UMakhoala usemnkantshubomvu kule ndima njengoba esebuya nakwiCantos of a Life in Exile, Nomzamo, Hijack Stories, This is Not a Burial, it’s a Resurrection, neThe Last Ranger, eyaqokwa kuma-Oscar.

Ukubuya kwakhe kwiScandal! kulindeleke ukuba kujiyise lo mdlalo njengoba ezoshaya amakhala ngokuqoma kwendodakazi yakhe indoda eshadelwe.

Lokho kuzoqubula imibuzo ngokuzibandakanya kwabazali ezindabeni zobudlelwano bezingane zabo. Abanye bazibuza ukuthi ngabe uReggie uzoyisiza indodakazi yakhe noma uzonqanda ubudlelwano bayo.