Ibehle ngaphezulu abe-ANC eyokukhishwa kwemeya

IBEHLE ngaphezulu abaholi be-ANC KwaZulu eyokukhishwa kwemeya kaMasipala waseMpendle, uMnuz Buyisani Mlaba, elahlwe ngisho amakhansela eqembu ngesikhathi kuvotelwa isiphakamiso sokungabethembi ubuholi bayo.

UMlaba ukhishwe ngesiphakamiso sokungabethembi ubuholi bakhe.

Isiphakamiso sokungabethembi ubuholi bukaMlaba siphase ngenxa yokuthi amakhansela e-ANC akhethe ukungavoti.

Okhulumela i-ANC KwaZulu-Natal, uMnuz Fanle Sibisi, uthe basazohlangana namakhansela e-ANC ukuze bathole umbiko ogcwele.

Isiphakamiso sokungabethembi ubuholi bukaMlaba besifakwe amakhansela e-IFP ne-EFF.

I-ANC iwuphethe ngokunethezeka lo mkhandlu njengoba inezihlalo eziyisithupha kweziyishumi.

I-IFP ne-EFF bona banezihlalo ezimbili iqembu ngalinye.

Ngesikhathi kunesiphakamiso sokungabethembi ubuholi bukaMlaba, kube uyena yedwa ovotela ukusiphikisa, kwathi amanye amakhansela amahlanu e-ANC akhetha ukungavoti.

USibisi uthe basalinde ukuthola umbiko ogcwele ngalolu daba.

"Iqiniso wukuthi besingakahlangani nobuholi be-ANC esifundeni (iMoses Mabhida) kanye namakhansela eqembu kuMasipala waseMpendle ukuze sizwe ukuthi ngempela kwenzekeni. Njengamanje asikwazi ukuphawula kahle ngalolu daba ngoba asikawutholi umbiko ophelele."

Uthe:"Sizoba nomhlangano nabo zingakapheli izinsuku ezimbili. Emva komhlangano sizokhipha isitatimende esigcwele."

Umthombo weSolezwe uthe sekunesikhathi eside amakhansela e-ANC ekhala ngoMlaba.

"Kukaningi bekhala ngaye ebuholini be-ANC. Ziningi izincwadi abazibhalile becela ukuba kuthathelwe uMlaba izinyathelo. Yingakho bevele bakhetha ukungavoti ngesikhathi kunesiphakamiso sokungabethembi ubuholi bakhe. Asazi ukuthi ubuholi be-ANC buzoyithini le ndaba ngoba kusobala ukuthi abasamfuni ngempela uMlaba."

UMasipala waseMpendle ubhekene nenkinga yemali njengoba wehluleka wukuholela abasebenzi ngoMeyi.

Amakhansela e-IFP nawe-EFF asola uMlaba ngokwehluleka wukuhola umkhandlu  nangokuqamba amanga ngesimo somkhandlu.

"UMlaba akazange akhulume iqiniso ngesimo semali kumasipala ngesikhathi ekhuluma nabezindaba kulandela ukwehluleka komkhandlu ukuholela abasebenzi ezinyangeni ezimbili ezedlule. Futhi uMlaba wehluleka wukuchazela ubuholi ngesikhathi kunenkinga yokungaholelwa kwabasebenzi njengoba engazange afike ukuzoxazulula inkinga."

Amakhansela e-IFP ne-EFF athe uMlaba uyalova emihlanganweni yomkhandlu.

"UMlaba akayibizi imihlangano yekomiti angusihlalo walo."

Akhale nangokuthi imoto ehamba uMlaba isike yaba sezingozini kodwa wangawuletha umbiko wengozi emkhandlwini.