Zibakhalele abakwaMasipala weTheku ababanjwe beba udizili

BALALE bebaliwe abasebenzi bakuMasipala waseThekwini ababanjwe oqotsheni bentshontsha  udizili emalolini amanzi.

Kuphele amahlathi okucasha kulaba basolwa ngesikhathi bebhadanywa bemoma udizili emalolini, bewufaka ezigujini. Abasolwa baficwe begila lo mkhuba emzini oseKukhanyeni, eduze naseVerulam.

Ngesikhathi abaphenyi bomkhandlu befika kulo muzi bafice abasolwa bemoma udizili elolini, iloli lesibili lona belimi esangweni lilinde ukuzothulula.

Omabili la maloli abethwele amanzi obekufanele awahambise ezindaweni ezingenawo amanzi.

Abasolwa bebevele becushelwe unoxhaka njengoba bese kunesikhathi eside belandelwa, ngemuva kwemibiko yokuthi amaloli amanzi omkhandlu ayabonakala ethulula udizili kulo muzi.

Abasolwa bavulelwe icala esiteshini samaphoyisa eNanda.

Inhloko yophiko oluphenyayo kuMasipala waseThekwini, iCity Intergrity and Investigations, uMnuz Jimmy Ngcobo, income ukuzinikela nobuhlakani babaphenyi abebelandela lolu daba.

"Sizoqhubeka nokuphenya ngokuntshontshwa kukadizili kule ndawo njengoba kuthiwa udla lubi lo mkhuba. Angeke sivume ukuthi abantu bantshontshe impahla yomkhandlu. Sinxusa abantu ukuba basibikele uma bebona lo mkhuba nezinye izenzo zenkohlakalo khona sizophenya."

UNgcobo uthe abasolwa babanjwe nezigubhu ezingo-25 litres ezingu-12, athe kusho ukuthi bantshontshe u-300 litres kadizili.

UNgcobo uthe udizili ontshontshwa emalolini omkhandlu udayiselwa abantu basendaweni.

UNgcobo uthe bayaqhubeka nokulwa nenkohlakalo emkhandlwini.

Izibalo zikhombisa ukuthi kunabasebenzi bomkhandlu abangu-25 abavulelwe amacala kulo nyaka wezimali.

Uphiko luphenya amacala okuntshontshwa kwempahla yomkhandlu angu-126, kanye nangu-181 enkohlakalo nokukhwabanisa onke enzeke kulo nyaka wezimali.