OwoKhozi ukhuza ukuhlukunyezwa kwabesifazane ngomcimbi

UMSAKAZI woKhozi FM, uBingelela Mpanza, uthi uhlose ukuqhakambisa indawo yangakubo ngeNongoma Big Night Music Festival, kuyo azophinde akhuze isihlava sokuhlukunyezwa kwesibhuda.

Le festival izoba sezinkundleni zemidlalo zaKwaLindizwe, KwaNongoma, ngo-Ephreli 26 kusukela ngo-1 emini.

UBingelela osakaza uSigiya Ngengoma ngemiGqibelo neSigqi Sase-Afrika ngoLwesine ngo-12 phakathi kwamabili, uthe sekukaningi uNongoma ubukeleka phansi ekubeni unezinto ezingamagugu njengeHlalankosi.

"Ngaphandle kwalokho, ngalo mcimbi sihlose ukukhuza isihlava sokuhlukunyezwa kwabantu besifazane nezingane. Udlame lobulili lapha ngakithi lubhokile. Sifuna ukuqwashisa ngobubi balo emphakathini bese sikhuthaza okuhle."

Uthe kusasa kulindeleke benze inhlabaluhide ngezimoto ngenhloso yokugqugquzela abantu ukuba bafike ngobuningi babo bezozitika ngobumnandi obuhlukahlukene.

"Ngalolu suku kunabantu esizobabungaza ngemisebenzi emihle abayenzela umphakathi."

Kubaculi ababoshelwe kwiNongoma Big Night Music Festival, kubalwa uBabes Wodumo, AmaSiblings, Buselaphi, Thokozani Langa, Menzi, Imfezemnyama, Luve Dubazane, Mjolisi, Ithwasa Lekhansela, Mzukulu, Dumakahle, Mdumazi, Njabulo Langa, Malahle, NKR, Jongelihle, Inkosi Yamagcokama, Mayoghurt, Mashwabana, Mabhungu Ayamfoqoza, Mafikizolo, Mkhulekelwa, Gadla Nxumalo, Ngizwe Mchunu, Mashelela, Skhumba STS, Mudemude, Lamula Bhasini, Navigator Gcwensa nabanye.

Uhlelo luzobe luphethwe nguTshatha Ngobe, Zimdollar Biyela, Selbeyonce Mkhize, Mdonso Ngcobo, Londa Mbatha, Kiss Before, Londi Gazu, Welcome Ntombela, Ntezimnandi, Nqubeko Ndlela, Mroza Buthelezi, Guzasta, MC Gwajo, Sizwe Buthelezi, Umsakazi Ongadumule, Mfanuphetheni noMC Wesizwe.

Esephetha, uBingelela unxuse izethameli ukuba ziphuthume kuma-Computicket, Shoprite, TicketPro nasezitolo zaseSpar ngoba amathikithi adayisa ubuthaphuthaphu ngo-R100 nango-R500, kwabafuna ukugudlana ngamahlombe nezicukuthwane.