Kubanjwe umoya ngabazomela umaskandi kwiGcwalisa

KUZOLALWA kusasa sekwaziwa ukuthi yibaphi abaculi bakamaskandi abangene ngembobo yenalithi kwiGcwalisa Spring Picnic: Maskandi Top 15.

Ngokwesitatimende sabagqugquzeli balo mcimbi oseHollywood Bets Kings Park Stadium eThekwini, ngoNovemba 8, uhlu oluphelele lwabaculi abazobe benandisa kulo nyaka luzomenyezelwa esithangamini sabezindaba kusasa (Okthoba 1). 

Yize ukuvotelwa kwabaculi bakamaskandi kuvalwe ngoLwesihlanu, kodwa uhlu lwabaculi ebebehleli phambili lugcine ukuvezwa ngoLwesibili olwedlule. Bekuhleli phambili uMajongosi, elandelwa uFalabo, Dizastar, uMafikizolo, uMjikelo, Sphithiphithi, uNgena, Nhloso, Phangandawo, Gatsheni, Mzukulu, Mkhulekelwa, Maganga Thishela, Menzi noThandazani.

NgoSepthemba 12, bekuhleli phambili uMjikelo, elandelwa uFalabo. Bekukhona nabaculi ebesebengasabonakali ngesonto eledlule okungoNjoko, Swidi, Imfezemnyama, Mahostela 97 noJaiva Zimnike. UMajongosi noMafikizolo bebesemsileni.

NgoSepthemba 5, bezisaholwa uMjikelo, elandelwa wuNhloso. Akade bekhona kodwa abangasabonwa nangokhalo ngoMfanomhlophe noNelisani Isiqhwaga SakwaQethuka. Ngakho kubanjwe umoya ngabaculi abazogcina bengenile njengoba libukeka lisefa ulwandle, luthatha osemsamu limphonsa emnyango.

Amavukane abebukeka ezidlela amahlanga kubaculi asebenegama njengoba abeshintshana ngokuhlala esicongweni. Abagqugquzeli bancome banconcoza kubantu abavotele amaqhawe abo kulo mqhudelwano.

"Imiphumela izoqinisekiswa maqede ihlanganiswe bese kumenyezelwa uhlu oluphelele lweGcwalisa esithangamini sabezindaba ngo-Okthoba 1. Siyakuqinisekisa ukuthi lonke ivoti libaliwe futhi kwasetshenziswa ubulungiswa."

Babonge kubaxhasi nakubobonke abalandeli ngokubambisana nabo kuze kube yimanje.

"IGcwalisa akusiwo umcimbi kodwa yindlela yokugubha usiko, ukuqhakamisa ikhono nokuhlanganisa abantu. Ngakho zilungiselele umgubho ongasoze wawukhohlwa ngoNovemba 8, eKings Park Stadium."

Amathikithi asatholakala eComputicket, Shoprite/Checkers, eTicketpro, Spar nasePayzone ngo-R250 nango-R1500 (ayisibalo esincane).