Kuzohlonishwa uMshengu ngedili lomculo

KUZOHLONISHWA ingqalabutho yomculo wesicathamiya nengumsunguli weLadysmith Black Mambazo, uSolwazi Joseph "Mshengu" Shabalala ePlayhouse Opera Theatre, eThekwini ngoSepthemba 24.

Le ndumezulu yomcimbi igqugquzelwa wumdidiyeli womdlalo wopopayi iLion King, uLebohang "Lebo M" Morake. Uthe uthathe isinqumo sokuthulela uMshengu ngenxa yokuthi ungumculi oyingqungqulu eshaya amaphiko edabuka kuleli.

"Amagalelo akhe asabonakala ngisho namanje. Uyiciko elavulela inqwaba yamaciko indlela ebheke phesheya kwezilwandle. Ngakho ayikho indlela engcono yokumkhumbula eyedlula eyalo mcimbi."

UMshengu wadlula emhlabeni ngoFebhuwari 2020, eyibekile induku ebandla ngomculo wesicathamiya. Inkosana kaMshengu, uNkosinathi Shabalala, ithe ikujabulele kakhulu ukuqhamuka komuntu azotusa amagalelo kayise.

Uthe nabo njengomndeni lokhu kwenza baziqhenye kakhulu ngokuzalwa yileli qhawe. Kosaziwayo abazobe besina bededelana kuleli dili lo mculo kubalwa umrepha uBig Zulu, umculi kamaskandi uKhuzani, uMinnie Dlamini, uBoity Thulo nabanye. 

Ngokusho kwesitatimende kunezinye izinduku ezifihlwe emqubeni. Kwenzeka lokhu nje iLadysmith Black Mambazo igubha ukuqeda iminyaka engu-65 yasungulwa futhi ihlonishwe ngomklomelo emcimbini iZiyakhala Mo Sun City eNorth West.